MIDSAYAP, North Cotabato -- Gisang-at na ngadto sa korte ang kaso batok sa amahan nga nitigbas ug niatsa sa iyang 17-anyos nga anak babaye alas 5:15 sa buntag niadtong Lunes, Hunyo 17.
Unang gikataho nga ang suspek nga si Jesus Socito, 35, maoy ama-ama sa biktima nga si Jeanny Mae Rollan Socito. Apan subay sa blotter sa Midsayap Municipal Police Station, tinuod nga amahan sa biktima ang suspek.
Si Jeanny Mae nagtungha isip Grade 11 sa Saint Jude College ug nagpuyo sa housing area sa Barangay Upper Glad 1 sa nahisgutang lungsod.
Dugang sa pulis, wala sab sulayi og lugos sa suspek ang biktima.
Sumala sa mga silingan sa biktima nga nakadungog sila nga dunay misinggit og tabang dungan sa nilagubo sa sulod sa gipuy-an sa mga Socito.
Wala madugay, ilang nakita nga nigawas si Jesus sa ilang balay nga dunay dala nga sundang ug atsa nga nagkadugo ug daling miikyas.
Giingong nagtubag-tubag ang anak sa iyang amahan tungod kay sagad gabii na nga mouli kini sa balay hinungdan nga napawong ang panan-aw sa suspek ug gipatay ang biktima.
Nagbasol ang suspek sa pagpatay sa anak hinungdan nga misurender ngadto sa mga opisyal sa barangay.
Ang suspek naa sa kustodiya sa Midsayap Municipal Police Station, ubos ni Lieutenant Colonel Benito Rotia. (Edgar E. Fuerzas)