USA ka ginang ang mipatala sa kapulisan human siya gikawatan og dakung kantidad sa salapi didto sa dakbayan sa Tagum.
Ang biktima mao si Erlinda Gado, hamtung ang panuigon, ug molupyo sa Rabe Subdivision, Barangay Visayan Village, dakbayan sa Tagum.
Sumala sa sumbong sa biktima nga nakutlo gikan sa blotter sa kapulisan nga alas 2:30 sa hapon niadtong Biyernes, dihang padulong unta siya nga modeposito sa iyang kwarta ngadto sa bangko.
Apan iya na lamang nga nadiskubrehan nga ang iyang kwarta balor og P36 mil pesos ug tseke balor P2,700.00 ang nahanaw kini, posibleng gibitbit sa mga kiriwan og kamot.
Usa ka Anabel Gado ang mitaho sa biktima labot sa pagkawala sa iyang kwarta.
Apan nagduda ang biktima ang ang iyang katabang nga lalaki ang mikawat sa maong salapi sanglit way laing misulod sa iyang panimalay.
Ang biktima igo na lamang sa pagdangop ngadto sa buhatan sa kapulisan.
Samtang mga sakop sa Tagum City Police Station mihimo na og dugang pakisusi sa nahisgutang hitabo. (Marvin Pineda)