TUYO nga gidasmagan ang Filipino Fishing boat sa usa ka Chinese vessel didto sa Recto Bank kun Reed Bank aron kini malunod uban sa 22 ka mga tripulante.
Kini maoy gideklarar sa mga tripulante sa nalunod nga fishing boat sa ilang pag-abot sakay sa Phil. Navy ship dunggo didto sa Occidental Mindoro.
Usa kini sa pagpakita nga ila na ang Recto Bank nga unta kabahin man ni sa Palawan nga probinsiya sa Pilipinas. Kon mao ila na gyud nga giangkon ang atong teritoryo.
Kinahanglan klaruhon kon Chinese military vessel ba ang tuyong nibangga di ba sibilyan nga fishing vessel lamang nga nag-abusar sa kadagatan.
Kon military vessel dakong umaabot nga kasungian ni sa atong relasyon sa China. Karon diplomatic protest pa ang atong gipadangat seguro putlon na ang diplomatic relations tungod niini.
Unta, ipatumaw gyud ang tinuod sa imbestigasyon di kay tabon-tabunan lang ang matuod. Ang Chinese embassy nipasalig sad nga ila ning imbestigahon.
Kinahanglan may resulta ang ilang imbestigasyon ug kini ilang ipahibawo sa katawhan sa Pilipinas. Di kay mabutang lang dayon sa kalimot kay nagpakaaron-ingnon lang.
Hain man ang giingong maayo natong relasyon sa China? Gipasiatab man gani nga andam ang China nga motabang nato. Mao nang humok kaayo ang palasyo sa China.
Kon military vessel ang nibangga sa Filipino boat lain na ang gipasabot. Dinhi masuwayan na ang kaisog ni Presidente Duterte paglaban sa dignidad sa atong soberanya.
Tinuod, sayon ra tang dapugon sa China sa iyang military might. Apan kining lindog nagtuo nga di ang China magdali-dali tungod sa atong Mutual Defense Treaty sa Estados Unidos.
Ang pag-atake sa Pilipinas maoy pag-atake sa Estados Unidos suma sa maong treaty. Husto ning pagbirig-birig sa U.S. warship sa South China Sea.
Matrido kining nasod nga may itom nga tuyo. Ang kasaysayan nagsulti sa ka-matrido sa Japan kaniadto. Samtang nagpadag ambassador aron makigsabot sa Estados Unidos, gibombahan na diay nila ang Pearl Harbor sa Hawaii.