DEAR Atty. Joan,
Maayong adlaw. Ako diay si Rosa. Nagtrabaho ko sa usa ka hotel nganhi sa syudad sa Sugbo. Kadtong isa ka adlaw kay nakasab-an ko sa among incoming guest kay wala namo sila gipa-check-in kay naa man sya’y kauban nga bata.
Nasuko siya namo kay nganong wala mi ningsugot nga mag-check-in sila nga mungbayad ra man daw sila ug guest ra sab nila ang bata. Sakto ra ba to among gibuhat? Mao may patakaran sa among management.
Rosa
Dear Rosa,
Ang atong balaod nga RA 7610 o ang child abuse law kay nag-ingon nga kung kinsa ang nag-uban og usa ka menor de edad, nag-edad og dose (12) anyos or paubos o manghud og napulo ka tuig, ngadto sa publiko o pribado nga lugar, hotel, motel, diskohan, pension house, imnanan, sauna o massage parlor, beach o sa uban pangturista nga lugar o parihong lugar kay mapriso og mamultahan.
Kini kung ang menor de edad kay dili niya kadugo o wala siya relasyon nga giila sa balaod, custom og tradisyon. Kung kinsa man ang tag-iya, manager o ang tawo nga gibinlan sa operasyon sa usa kay publiko or pribabo nga establisemento para akomodasyon, nga ningtugot nga mag-uban siya og guest nga menor de edad, kay manubag sab sa balaod sama sa pagka priso ug pagmulta.
Maayo ra sab tong inyong gibuhat sa pagdili ninyo sa pagpa-check-in sa inyong guest nga adunay menor de edad nga kauban og dili kadugo.
Possible nga manubag sab mo tungod sa inyong pagtugot nga mahimong risgo ang kahimtang sa usa ka bata.
Ang inyong gibuhat usa sa mga polisiya sa pagprotektar sa bata ug mas maayo nga mapalapdaan pa ninyo ang pag protehir sa kabataan sama sa pag-report o pakig-coordinate sa mga ahensya nga makatabang sa atung kabataan sama sa police station kong adunay kadudahang kostomer.
Ang CLB naghatag og Training para sa Travel and Tourism establishments. Pwede mi ninyo sulatan og tawgan para sa maong training. Hinaut nga kini nakatabang sa kanimo..
Atty. Joan
Pahibalo: Kini opinyon lamang nga nag-base sa inyong lakbit-saysay ug kini pwede nga mausab kun dugang pa nga mapatin-awan ang mga detalye. Kon adunay pa kamoy mga pangutana nga adunay kalabutan sa katungod sa mga bata, mahimo kamong mo-message sa among Facebook account CLB.