NING hapuna paspas nga nakasul-ob si Danilo sa iyang itom nga dyaket nga gisapaw niya sa iyang putting T-shirt. Giluklok dayon niya ang serbis niyang nikiladong kalibre .45 sa hawakan sa iyang maong nga karsones. Nahibulong nga miduol kaniya ang iyang maestrang asawa nga si Trixia ug ang iyang anak dalagang si Nene nga bag-o lang nakapasar sa ‘bar exam.’
“Dan, di ba day-off man nimo ron? Wa kay duty ron sa police station nga imong gialagran” matod ni Trixia.
“Bitaw, Pa. Father’s Day karon. Bangkahan ka namong Mama og panihapon sa Vikings Restaurant sa SM,” ni Nene nga mipikpik sa abaga sa iyang amahan.
“Gitawgan ko sa among Hepe. Emergency operation. Akoy gitahasan pagpangulo sa pagronda sa usa ka drug den dinhi sa siyudad nga maoy bagsakanan sa kinilong shabu ug lublubanan sa mga adik-adik nga estudyante,” matod ni Danilo.
Hugot nga gitutokan ni Trixia si Danilo. “Nasayod kong naglungot-lungot ka nga maoy makadakop sa nahisalaag tang anak lalake, Dan. Palihog, ipatigbabaw ang imong gugma isip iyang amahan!”
Wala na tubayi ni Danilo ang iyang asawa. Nagdali siyang misakay sa serbis niyang motorsiklo human manamilit kang Trixia ug Nene. Usa siya ka pulis nga nagranggo og SPO4 sa siyudad. Kanunay siyang gitahasan sa ilang Hepe nga maoy mangulo sa kaubang mga pulis kon dunay rondahon nga drug den aron pagsikop sa tag-iya niini ug sa mga adik-adik nga manunuyopay. Buot usab niya nga siyay makasikop kang John Tom, ulitawo niyang anak nga duha na ka bulan nga wala na mopauli sa ilang balay. Ug nasayran sab nilang magtiayon nga wala na diay mosulod sa klase sa unibersidad nga gitunghaan niini. Maoy hinungdan nga wala kini makagradwar sa kursong civil engineering ning semestera. Nabuang kini sa pagpakigbarkada ug pagsuyop og shabu ug wala ibayad ang kuwarta para sa ‘tuition fee’ niya sa tibuok semester. Hilabihang laguta ni Danilo nga naghunahuna sa sutil ug suwail nga kamanghurang anak lalake. Duha day anak nilang Trixia, sila Nene ug John Tom.
Uban sa napulo ka mga sakop nga pulis nga armado og armalayt nga mga riple nga wala mag-uniporme, gironda nilang Danilo ang usa ka matahom ug desenteng balay nga dili gayud mailhan nga usa ka drug den. Nadakpan nila sa akto ang Insek nga maoy tag-iya uban sa drug supplier nga may bultong kinilong shabu. Daghan ang mga estudyanteng lalake nga nadakpan. Napusasan usab ang naaktuhang naghithit og shabu sa maong drug den.
“Pa, ayaw kog iapil pagpadakop sa sakop mong pulis! Ipatangtang ang akong pusas, Pa!” nagpitok-pitok ang mga mata ni John Tom. Miduol siya sa iyang amahan nga nagtindog haduol sa tulo ka patrol car. Nangabot pod ang mga sakop sa media.
“Mipatigbabaw ang akong gugma kanimo, John, isip imong amahan. Apan kinahanglan magtingkagol ka sa prisuhan aron makakat-on kag leksiyon. Bahala nag maduhig ang akong ngalan!” matod ni Danilo ngadto sa iyang anak. Unya mimando siya sa mga sakop niyang pulis aron pasakyon sa mga patrol car ang tanang pinusasang mga dinakpan, lakip na ang anak niyang ulitawo nga na-adik sa shabu. (KATAPUSAN)