GIBALDA og insidenteng pagpamusil ang dakong kasaulogan sa bag-ong kampiyon sa National Basketball Association (NBA) nga mao ang Toronto Raptors nga gisaksihan og gibanabanang moabot sa dos milyones ka mga tawo lakip na si Canadian Prime Minister Justin Trudeau kagahapon.
Lima ka double-decker nga mga bus nga nagdala sa mga magduduwa sa Raptors kauban ang ilang mga sakop sa pamilya ang inanay’ng mingsubay sa ninghagip-ot nga kadalanan tungod sa kadaghan sa mga tawo.
Nalangan og duha ka mga oras ang pag-abot sa convoy sa atubangan sa city hall sa Toronto diin gisugat ang Raptors ni Trudeau ug uban pang mga lider sa Canada.
Apan sa wala damha, nahitabo ang pagpamusil diin upat ka mga tawo ang nahidangat sa ospital.
Gipasabot ni Police Chief Mark Saunders nga dili ra delikado ang kondisyon sa mga biktima.
Adunay uban nga nangaangol sa dihang nagdinaganay na ang mga tawo palayo sa insidente.
Nagkanayon si police spokeswoman Allison Sparkes nga padayon pa silang nagpahigayon og imbestigasyon kon aduna ba’y kalambigitan sa terorismo ang panghitabo.
Hinuon nagpadayon ra gihapon ang kasaulogan sa kalampusan sa Raptors, nga karon pa nakatilaw og korona gikan sa ilang pagsulod sa NBA, 24 na ka mga tuig ang nakalabay.
“It’s the culmination of playing for 24 years. We’ve been waiting a long time for this,” matod ni Raptors fan Chris Rogers.
Isip usa ka nasod, mao kini ang labing unang mayorihiyang titulo sa Canada sulod sa 26 ka mga tuig hinungdan nga grabe ang kahinam sa ilang mga tawo.
Sa kadaghan sa mga tawo, adunay uban nga gikarga na sa stretchers gumikan sa dehydration.
Si Toronto Mayor John Tory opisyal nga mideklarar sa petsang Hunyo 17, 2019 nga usa ka holiday nga gitawag nga “We The North.”
“This championship is the culmination of years of patience, support, devotion and belief. Toronto has proven that it is a basketball city and that the game thrives in The North,” opisyal nga pamahayag ni Tory.
Ang mga sakop sa Raptors mapasalamaton sa suportang gihatag sa ilang mga sumosunod.
“It’s been amazing,” matod sa gitawag na’g King of the North nga si Kawhi Leonard.
“Thank you Toronto, thank you Canada for the support. We did it.”
Adunay mga sumosunod sa Raptors ang nagdala og placards nga adunay nakasulat nga nag-awhag kang Leonard nga magpabilin sa team.
Si Leonard, kinsa maoy napiling Finals MVP, mahimo na’ng usa ka free agent karong summer. (AP, ESL)