MISMONG si Filipino boxing icon Manny Pacquiao ang miangkon nga ang pagpakigbatok kang American Keith Thurman mao ang labing lisod niyang away nga sagubangon sukad masukad.
Ang Pambansang Kamao ng Pilipinas makigbatok kang Thurman karong Hulyo 20 sa Las Vegas, USA.
Hinuon gitataw ni Pacquiao nga bisan gamay, wala siya nahadlok nga makigsangka sa usa ka lehitimong knockout puncher taliwala sa kamatuoran nga mag-edad na siya’g 41 karong Disyembre.
“At age 40 I want to prove I can still beat an undefeated champion. I like being an underdog in this fight. Keith Thurman does not scare me. Keith Thurman does not intimidate me,” asoy ni Pacquiao sa interbyu sa Bad Left Hook.
“Keith Thurman has inspired me. I am training harder than ever. This is the biggest test of my career. It is a story that is 40 years in the making.”
Sa labing ulahi niyang duha ka mga away batok nila ni Lucas Matthysse ug Adrien Broner, napamatud-an ni Pacquiao nga aduna pa gihapon siya’y igong kaabtik ug kusog.
Apan dili ikalimod ang kamatuoran nga mius-os na’g gamay ang abilidad ni Pacquiao nga puwedeng mapahimuslan ni Thurman.
Si Pacquiao adunay 61-7-2, 39 KOs nga rekord samtang si Thurman, 30, naggunit og 29-0, 22 KOs nga baraha.
Sa laing bahin, mapasalamaton si Pacquiao sa iyang kanhi promoter nga si Top Rank boss Bob Arum sa pagpahimangno kaniya nga mag-amping sa pagpakigbatok niini kang Thurman.
Dili pa lang dugay, gipadayag ni Arum ang iyang kabalaka nga delikadong makasinati og brain damage ang bugtong 8-division world champion sa pagpakig-away niini kang Thurman. Nagkanayon si Pacquiao nga wala’y angayang ikabalaka si Arum.
“God is good all the time,” asoy ni Pacquiao. “That’s boxing but God is always there to protect me and there’s nothing to worry about.” (ESL)