GIPAKITA sa Linao-Lipata 1 ang kalidad sa usa ka defending champion sa dihang ilang gidominar ang Pakigne Baby Tigers, 101-71, sa pagsugod sa round-of-six sa Minglanilla Mayor’s Cup Summer League 21-under niadtong Lunes sa gabii sa Minglanilla Sports Complex.
Human sa sikit nga kombati sa unang duha ka kwarters, ang Linao-Lipata misugod og arangkada sa tungatungang bahin sa third quarter aron makaposte og 15 puntos nga labaw.
Si Ryzel Guillan Gilbuena mipakatap og 29 puntos, upat niini gikan sa three-point area, midugang og 19 puntos si Jan Mangaron samtang 13 puntos usab ang natampo ni Alton John Cabradilla alang sa Linao-Lipata.
Nangulo sa pildirong Pakigne si Ding Cabansay, sakop sa SWU Cobras, nga may 17 puntos ug 15 ug 10 puntos usab ang natali nila ni Justine Nebril ug John Castanares.
Hinuon, sa sayo pa, daan nang nakaposte og duha ka daog ang Pakigne sa managlahing division.
Sa 17-under, gibuntog sa Pakigne 2/Grims Catering ang Ward 4, 87-74, samtang sa Open division yano ra usab nga gipildi sa Pakigne Tigers ang Tungkop, 118-94.
Duha ka mga Caterers ang naka-double figure aron pangulohan ang kadaugan. Si Alquin Canada mitali og 21 puntos samtang 10 puntos ang nahatag usab ni John Alvarez. Nangulo sas Ward 4 si Joseph Alicaya nga may 19 puntos.
Sa open division, tagsatagsang mipabuto og tag 22 puntos sila si Eldred Dahilan ug Tatoy Dellerin, 21 puntos usab ang natali ni Kevin Peter Oleodo alang sa kadaugan sa Pakigne Tigers.
Ang torneyo iabagan usab sa Sangguniang Kabataan (SK) ug gidumala sa mga Commissioner nga sila si Monching Cadiz ug Geraldine Sedeno Canedo. (JBM)