MGA duwa karon:
4:30 pm- Rain or Shine batok NorthPort
7:00 pm- Meralco batok NLEX
Nakuha sa Brgy. Ginebra Gin Kings ang makapaukyab nga pointguard nga si Stanley Pringle gikan sa NorthPort Batang Pier pinaagi sa blockbuster trade nga giaprubahan sa Philippine Basketball Association (PBA) Commissioner’s Office kagahapon.
Isip baylo, nadawat sa Batang Pier gikan sa Gin Kings sila si Jervy Cruz, Sol Mercado, ug Kevin Ferrer.
Ning maong kalambuan, ikauban og balik ni Ferrer si NorthPort coach Pido Jarencio, kinsa maoy iyang coach sa dihang nagduwa pa siya sa University of Sto. Tomas Growling Tigers.
Si Pringle sulod sab sa lima ka mga tuig nga nagduwa sa prankisa sa NorthPort una kini mibalhin sa labing sikat nga basketball team sa nasod.
Hinuon dili pa makaduwa sa Gin Kings ang 2014 No.1 overall pick gumikan kay padayon pa kining nagpaalim sa angol sa iyang tuo nga tiil nga miagi og operasyon.
Sulod pa lang sa duha ka mga duwa nga nakapakita og aksyon si Pringle sa nagpadayon nga Commissioner’s Cup.
Hinuon bisan wala si Pringle, maayo ang dagan sa kampanya sa Batang Pier ug kasamtangan kining naggunit og 5-1 nga rekord diin nagsunod sila sa league-leader Talk N’ Text KaTropa.
Sa laing bahin, ang Batang Pier makigbatok sa Rain or Shine Elasto Panthers sa premirong duwa karong hapon sa Commissioner’s Cup sa Mall of Asia Arena.
Sa main game, magkrus ang dalan sa Meralco Bolts batok NLEX Road Warriors. (ESL)