ANG SIM card sa cellular phone nga gigamit nga triggering device sa duha ka mga improvised explosive device (IED) nga gitanom sa wala mailhing tawo sa comfort room City Hall ug sa entrance gate sa Central Bank giingon nga nakahimo sa pagkontak sa numero sa anak ug sa usa ka congressman, sigun ni Mayor Rodrigo Duterte kagahapon sa iyang programa sa telebisyon nga "Gikan sa Masa Para sa Masa" sa ABS-CBN.

Si Duterte mibulgar niini human gisusi sa mga eksperto nga ang SIM card sa cellular phone nga gigamit isip triggering device sa duha ka mga bomba nga napalgan niadtong Huwebes.

"Kadtong bomba is meant to scare the poeple. Ug ang SIM pack naay mga numero sa usa ka congressman. Naay unom ka mga phone calls nga ang gi-dial nga numero mao ang numero sa anak og congressman," pahayag ni Duterte.

Ang mayor nagbutyag nga ang numero sa maong cellular phone wala makahimo og tawag sa gawas sa siyudad mao nga layo ang posibilidad nga mga terorista ang naghimo sa maong bomb scare.

"Kadto nga number walay tawag outside Davao City. Ang significant adto, ngano nga kadto nga numero gikontak sa numero sa Congressman ug anak sa Congressman. Dili na nako i-elaborate basta migawas ang numero sa congressman," pahayag ni Duterte kinsa miangkon nga nakalusot ang nagdala sa bomba tungod kay walay gidid-an nga mga tawo nga mosulod sa comfort room sa City Hall.

"Open ang comfort room sa tanang tawo nga buot mogamit mao nga masuko ko kung naay dili pasudlon sa City Hall. Natukod ang City Hall pinaagi sa kwarta sa mga tawo. Ang mga naglingkod sa City Hall gisweldohan sab sa kwarta sa mga tawo. Dili pareho ang City Hall sa Congress nga istrikto kaayo ang mga gwardiya mao nga nakalusot sila," ni Duterte.

Ang mayor misaway kang House Speaker Nograles kinsa mipagya kaniya nga naghimo lamang senaryo aron mabalhin ang atensiyon sa publiko ngadto sa bomba imbes sa debate nga wala gitungha ni Bise Mayor Sara Duterte didto sa Ateneo de Davao University niadtong Huwebes.

"Is this a mere coincidence or some people only wanted to shift the public's attention to the discovered bombs and not to the debate which Sara chose not to attend," suma ni Nograles sa mga tigbalita.

Si Duterte nagsulti nga ang gipanghimo ni Nograles usa ka sinalbahis nga paagi.

"Wala ko nagagimik. Wala ko nag-imbento. Dili ko mahilig og drama. Dili ko pareho sa akong kaatbang sa politika nga hilig og gimik sama sa mock elections nga iyang gihimo sa UP Mindanao. Sinalbahis ning iyang pamaagi," suma sa mayor.

Sa gihimong press conference sa mga otoridad didto sa Davao City Police Office niadtong Biyernes, si Major Crisanto Calit sa 7th Explosive Ordnance and Explosives Batallion nagsulti nga ang nakaplagan nga mga bomba dili sama sa mga bomba nga gigamit sa mga lokal ug internasyunal nga terorista.

"Actually, ngayon lang kami nakakakita ng ganito. There was no shrapnels and no fragmentation and the two bombs were very identical to each other," ni Calit kinsa midugang nga dili kusog ang maong mga bomba.

Giingon sa maong opisyal nga dili tuyo nga mopatay og mga tawo ang mga tawo nga mitanom sa maong bomba. (AD)