MAKAPAHIMULOS ang mga konstituente sa Barangay Canjulao, Lapu-Lapu City sa bag-ong gi-renovate nga barangay hall.
Si outgoing Mayor Paz Radaza maoy nangulo sa sa blessing ug ribbon cutting ceremony sa gipa-ayo nga barangay hall sa Canjulao inubanan ni Barangay Kapitan Rey Tampus ug ubang opisyal sa barangay, kagahapon, Hunyo 18.
Moabot sa P1.3 milyones ang pundo nga gigahin sa Lapu-Lapu City government alang sa pagpa-ayo sa 75 metro kuwadrado nga area sa maong edipisyo.
“Hamugaway na gyud inyong pagbisita dinhi sa inyong barangay hall kong aduna kamo’y transaction nga buhaton”, tipik sa pamahayag sa incoming Congresswoman sa lone congressional district sa Lapu-Lapu.
Awhag sa opisyal ngadto sa mga opisyal sa Canjulao nga ipadayon ang pagtunol sa mga nag-unang serbisyo sa barangay ngadto sa ilang mga konstituente.
Si Kapitan Tampus, sa iyang bahin, mipaabot sa iyang pasalamat ngadto ni Radaza ilabi na nga nahatagan og katumanan nga mapa-ayo ug mapalapdan ang ilang barangay hall. (Meira Claire Jamisola – CNU Communications Intern)