MASUTA na unya kon unsa ka andam ang kagamhanan sa dakbayan sa Lapu-Lapu sa higayon nga maigo sa katalagman sama niadtong pagtay-og sa kusog nga linog niadtong 2013.
Ang buhatan sa Lapu-Lapu City Disaster Risk Reduction and Management (DRRMO) mopahigayon og press briefing alang sa 2nd Quarter National Earthquake Drill nga himuon ugmang adlawa, Hunyo 20.
Ang maong kalihukan kabahin sa pagsaulog sa tinuig nga earthquake drill ug pagbansay-bansay sa disaster preparedness diin magkatapok ang nagkadaiyang sektor sa Lapu-Lapu City nga langkuban sa DRMMO, Office of the Civil Defense, Guardian, LGU lakip na ang Department of Education aron hisgutan ang mga angayang himuon o aksiyon atol sa simultaneous earthquake drill.
Si Andy Berame, hepe sa DRRMO nipahinumdum unom na ka tuig ang milabay diin ang 7.2 magnitude nga linog nga miigo sa Central Visayas area ug ang epicenter didto sa lalawigan sa Bohol.
Ang maong linog nimugna og dakong kadaot sa pipila ka mga edipisyo sa city hall ug ubang government buildings ug properties.
Samtang si Cloyd Dedicatori, founder sa Geographic Unified Assistance Response to Distress Incidents with Agile Networking (GUARDIAN), mipahibawo nga labing importante ang komunikasyon kon adunay katalagman.
Nakita nga epektibo ang pag-umol og operation center software, usa ka emergency network aron sa pag monitor gamit ang android phones o tablets, aron dali ug mas paspas ang pag respondi sa disaster team. (Meira Claire Jamisola, CNU Communitation Intern)