SUBLING gipadayag sa transition team ni governor-elect Gwendolyn Garcia nga risgo na sa Kapitolyo ang pagmagahi niini nga ipahunong ang pagtrabaho sa Provincial Resource Center.
Kini human usab namahayag si Provincial Engineer Hector Jamora nga magpadayon ang proyekto ug dili kini maapektohan bisan kon gi-disapprove ang disbursement voucher alang sa paghatag unta sa pasiunang bayad ngadto sa kontraktor.
Matod ni Atty. Marino Martinquilla, miyembro sa transition team ni Garcia, posibleng mag-atubang ug kasong administratiba si Jamora tungod sa pamahayag niini.
Ang transition team ni Garcia nipasidaan sa mga department head nga dili iproseso ang billing sa kontraktor ug gisultihan na usab niini ang WT Construction nga dili ipadayon ang pag-trabaho kay dili ra gihapon sila mabayran.
Apan gipadayag ni Jamora nga obligado ang kontraktor tungod sa kontrata ug duna sab kini dako nga financial capability hinungdan nga way rason nga undangan nila ang proyekto.
“ They’re doing it at their own risk. And it’s also a risk on the part of Engr. Jamora for making that statement. That would probably put him administratively in hot water,” matod ni Martinquilla.
Nagpadayon ang pagkawot ug sheet filing sa construction site. Sigun ni Jamora nga dako unta og tabang kung mahatagan ang kontraktor sa advance payment o mobilization fee aron duna kini ibayad sa ilang mga trabahante ug inisyal nga implementasyon sa proyekto.
Moabot sa kapin P194 million ang buot ipagawas nga pondo alang sa maong katuyuan apan wala kini aprubahi ni Provincial Treasurer Roy Salubre.
Ang Garcia transition team nalipay sa gihimo ni Salubre, ilabi na usab kay pila ka higayon nang gibalik-balik ni Garcia nga dili niya ipadayon ang proyekto kay dili kini makatabang sa mga Sugbuanon. (AZLG)