DUGANG mga saksi pa sa pagpamusil sa Fil-Chinese nga negusyante uban sa duha niya ka mga anak, ang gihangyo sa mga pulis sa Mandaue City nga moduaw sa ilang buhatan, kini aron masayran kon kon robbery o murder ang maong hitabo.
Sa nakuha nga dugang impormasyon sa kapulisan sa usa sa mga saksi, usa sa mga gunman niabli sa pultahan sa driver’s side, nikuha sa bag sa biktima.
Giingong aduna pay nahitabo nga linabnutay sa bag, una hingpit nga nakuha sa mamumuno.
Apan mao kini usa sa buot unta nga pakisayran sa mga pulis gikan mismo sa mga nasamdan nga anak sa napatay nga Fil-Chinese national nga si Yi Feng Guo Yang, ang negusyante nga amahan.
Si Yang gipusil patay, atubangan sa iyang mga anak atol niadtong’ Domingo sa gabii, Hunyo 16 sa barangay Cubacub, Mandaue City.
Nasamdan ang duha ka mga anak nga anaa sa passenger’s seat nga sila Ginabelle Guo Yang, 18 ug manghud niini nga lalaki nga si Stefhen Guo Yang, 16.
Giangkon ni Police Colonel Julian Entoma, director sa Mandaue City Police Office nga blanko pa sila sa motibo sa krimen, ilabi na nga wala pa nakig-alayon kanila ang si bisan nga sakop sa pamilya.
Sa pagduaw ning tigbalita sa haya sa biktima sa Rolling Hills, bisan ang pagkuha og hulagway sa gawas sa chapel ang gikasuko na sa pamilya.
Hinuon matod ni Entoma nga gisabot una nila ang pamilya kay anaa pa sa kasub-anan.
Apan hangyo niya nga unta bisan adto nalang sa buhatan sa Chinese Consul sa Sugbo o kon asa sila komportable, mamahimo sila makuhaan og impormasyon.
Sa kuha sa CCTV footage diha sa gawas sa barangay hall sa Cubacub, makita nga ang giingong yellow nga motorsiklo nga gisakyan sa duha ka mga suspek ang unang ni-agi atubangan sa barangay hall.
Human sa laing duha ka motorsiklo nagsunod na ang L300 Van nga gisakyan sa mga biktima ug nagsunod kanila ang laing duha ka gitumbok nga mga mamumuno nga nagmotorsiklo usab. (FMD)