PIPILA na lang ka sakyanan ang hayan ma-release ni incoming Cebu City Mayor Edgardo Labella sa mga motorsiklo nga na-impound tungod kay ang drayber mi-counterflow.
Gibutyag ni Francisco Ouano, operations head sa Cebu City Transportation Office nga gipangkuha na sa mga tag-iya ang ilang mga motorsiklo nga nadakpan gumikan sa kalapasan sa Executive Order 34.
“Mostly ang naa (motorsiklo) didto sa impounding area dili bahin sa counterflow,” pahibawo ni Ouano.
Ang EO 34 gi-isyu ni outgoing Mayor Tomas Osmeña aron pagdakop sa mga motorsiklo ug mga sakyanan nga nisugat sa subay sa atbang nga kalsada.
Ang CCTO nakadakop og di mominos 8,000 ka mga motorsiklo ug mga sakyanan sukad kini gipatuman nga adunay multa nga tag P1, 000 dihang gisugdan kini pagpatuman niadtong Pebrero sa niaging tuig.
Ang maong lakang gisupak ni Labella kinsa maoy bise mayor ug iyang gihulagway nga ang maong matang sa penalty usa ka pagdaog-daog sa mga kabus kun anti-poor.
Subay sa EO 34, ang madakpan sa counterflowing kinahanglan nga i-impound ang iyang gimaneho ug malukat paglabay sa 30 ka adlaw.
Sa dihang mida-og na si Labella sa nakalabay mga eleksyon siya misaad nga iyang i-release ang impounded vehicles.
Si Ouano niingon nga niminos o wa na silay nadakpan sa ni-counterflow niining buwana sanglit wa na mohimo og operation ang Task Force Alpha nga konektado sa CCTO.
Dugang pa ni Labella nga iyang wagtangon ang silot nga impounding kay alang kaniya "anti-poor" kini.
Apan sa mga drayber nga nakalapas pahamtangan kini og penalty base Cebu City Traffic Code diin lakip sa nalatid ang counterflowing o reckless driving.