DUHA ka mga persons with disability (PWD) gikan sa siyudad sa Cagayan de Oro ang nisakmit og medalya atol sa ika 7 Philippine Sports Commission-Philspada National Para Games 2019 sa Bulacan Sports Complex, Malolos City, Bulacan.
Tulo ka mga medalya ang naangkon nila Simplicio Santiago, 58, ug Cyrus Creo, pulos residente sa Calaanan, siyudad sa Cagayan de Oro, sa dulang table tennis.
"Tulo ka bronze, single, double ug team. Sa una, nakadaog na pud ko sa table tennis," matud ni Santiago.
Gidugang pa niini nga dako kaayo kini og tabang ngadto kanila ilabi na sa ilang panglawas ug makdawat pa kini og mga insintibo.
Giingong sugod tuig 2012 pa kini nilambigit sa sports ug 22 na ka medalya ang nasakmit samtang duha pa lang sa table tennis tungod kay duha pa usab kini ka tuig sa pagdula og table tennis.
"Oo nakatabang kaayo sa person with disability, atong kapiskay sa panglawas good health pud, nakatabang pud kay makadawat man tag incentives. Gisuportahan man ni ni Mayor Moreno," pahayag ni Creo.
Nakadawat si Creo og silver nga medal sa double ug bronze sa team sa Cagayan de Oro, samtang walo gikan sa siyudad ang nisalmot sa maong kalihokan.