DUHA ka mga babaye nga gikatahapang karnaper nasikop sa Highway Patrol Group 7 niadtong Lunes sa hapon, Hunyo 17,sulod sa usa ka fastfood chain sa General Maxilom avenue, Siyudad sa Sugbo.
Usa sa nadakpan giila nga si Lara Marie Rubi Mabale,24, taga Surigao del Sur, kasamtangan nga nagpuyo sa usa ka hotel sa General Maxilom.
Lakip sa nadakpan si Emma Carcedo Nacorda, 45, taga Plaza Housing, Nivel Hills, Barangay Busay, Siyudad sa Sugbo.
Matod ni Police Captain Saturnino Sedigo, hepe sa HPG Metro Cebu, nga niadtong Hunyo 7, ning-abang ang duha og sakyanan ni Jame Tapuyao.
Ningpaila sila si Mabale ug Nacorda nga Emma ug Marites.
Sulod sa usa ka adlaw ang ilang kontrata nga moabang sa sakyanan, apan miabot nalang sa Hunyo 9, wa pa kini giuli.
Gitawgan ni Tapuyao ang nagpailang Emma apan giingong daghan kini og alibi hinungdan nga nagpa blotter na siya sa Talamban police station.
Nakig-alayon ang Talamban police sa HPG 7.
Ang awtong Toyota Viosdunay Global Positioning System (GPS) mao nasubay diin kini nahimutang.
Dali nila nga natultolan ang sakyanan sa Barangay Talamban ug nasuta nga giprenda kini ngadto sa laing biktima nga si Daniel Jayme Jr. og P150,000.
Sa pakisusi sa kapulisan, nasuta nga ang nagpailang Emma mao si Mabale, kinsa nagpahimo og fake nga official receipt (OR) ug certificate of registration (CR) sa sakyanan nga nakapangalan na niya.
Gikan sa Hunyo 9 hangtod Hunyo 17, giingong nagpadugang si Mabale og P100,000 aron makompleto na nga P250,000.
Wa masayod ang mga suspek nga naa na sa kustodiya sa HPG7 ang sakyanan.
Sa dihang nagkasinabot nga magkita sila sa usa ka fast food chain, gilusad dayon ang entrapment operation alas 3 sa hapon niadtong Lunes, Hunyo 17.
“Uban nato ang complainant during sa operation. So, pagduol sa complainant mao tong ato dayon gidakop,” matod ni Sedigo.
Ang ilang modus mao ang pag-abang og sakyanan ug mangitag kaprendahan. Magpahimo silag peke nga OR ug CR sa sakyanan aron ipatuo sa ilang biktimahon nga ila ang sakyanan. Kahapon, Hunyo 18, gipasaka na ang kasong Anti Carnapping Law ug Falsification of Public Documents. (AYB)