KAPUYO ni Renato Llenes, suspek sa pagpatay kang Christine Lee Silawan, usa sa lima ka mga tawo nga makadawat og mas dakong pahat sa P1 million nga reward money.
Ang laing 18 sa 23 ka mga tawo mabahinan lang og gamay kay menor ra ang ilang papel sa pagkasikop ni Llenes.
Ang P1 million gikan sa panudlanan sa Kagamhanan sa Dakbayan sa Lapu-Lapu nga gisaad ni Mayor Paz Radaza nga ihatag sa tawo o mga tawo nga makatabang sa pagkasulbad sa linuog nga pagpatay ni Silawan.
Gikompirmar kini sa director sa Lapu-Lapu City Police Office, Police Colonel Limuel Obon, kinsa namahayag nga 23 ka mga tawo ang mabahinan sa ganti.
Giklaro ni Obon nga pulos civilian ang makadawat sa salapi, way bisan usa nga pulis.
Ang live-in partner ni Llenes, kinsang ngan gipugngan sa kapulisan, maoy usa mga nihatag og taho sa kapulisan nga posibleng dunay kalambigitan sa pagpatay ni Silawan dihang nanguha pa ang kapulisan og impormasyon sa pag-ila sa akusado.
Niadtong higayuna, aduna nay nawong sa akusado ang kapulisan pinaagi sa kuha sa CCTV nga hayag pa dihang nagpadayon ang ilang imbestigasyon.
Apan wa silay ideya kon kinsa ang naasoyng lalake hinungdan nga nagpangutana sila sa mga tawo hilabi na sa Barangay Pajac.
Usa sa nakatudlo mao ang live-in partner ni Llenes.
Aduna silay upat ka mga anak ni Llenes nga pulos pa mga bata. Wa pa mobutyag ang LCPO pila ang dawaton sa mga mabahinan sa reward money.
Magdepende kini sa natampong impormasyon sa ilang impormante.
Gawas sa reward money sa kagamhanan sa Lapu-Lapu, wa pa sila makadawat og komunikasyon sa ubang ningsaad og ganti hangtod karon, apan wa kini igsapayan ni Obon.
“Magiging precedent kon mahatag na ni Mayor ang katong iyang promised reward. Pero kadtong P100,000, ang regional director ang nag-promise ato that he will visit the Regional Advisory Council aron mas dali sila pahibaw-on kon naa na ang sa reward sa city,” matod ni Obon.
Agi og pagpakita sa transparency, usa ka pormal nga turnover sa salapi ang pagahimuon sa Kagamhanan sa Lapu-Lapu karong semanaha ngadto sa kapulisan, matod ni Radaza.
Usa usab kini ka paagi sa paghatag og gibug-aton ug bili sa kalampusan sa kapulisan sa ilang pagsulbad sa kaso.
Ang pulis na unya ang moapod-apod niini ngadto sa ilang mga impormante nga nakatabang sa pagsulbad sa kaso.
“Basin karong Friday or within this week ang amo gi-work out ako pa gipa-check sa city attorney. But as what I have said, ari gyud na sa pulis sa Lapu-Lapu City. Anyway duna na man silay mga ideas on how to kuan sila na ana,” matod ni Radaza.