SUPERBALITA CEBU

Kanhi Medellin mayor gipusil-patay sulod sa ospital

(Hulagway gikan sa Facebook account ni Ricardo Ramirez)

GIPUSIL-patay sulod sa iyang hospital room ang kanhi mayor sa Lungsod sa Medellin nga si Ricardo Ramirez Martes sa gabii, Hunyo 18, 2019.

Base sa inisyal nga report, mga armadong lalaki nga nagsul-ob og bonnet ug gihulagway nga "Tagalog-speaking" ang nisulod sa kuwarto ni Ramirez sa Bogo-Medellin Medical Center (BMMC) niadtong alas 11:50 sa gabii.

Giingon gipusil-patay ang kanhi mayor sulod mismo sa pansayan sa iyang kwarto.

Wala sad makasukol ang jail guard nga gitahasan nga mobantay ni Ramirez kay siya mismo gidis-armahan sa mga wala pa mailhing suspetsado.

Matud sa usa sa mga gwardiya sa ospital, upat ka van diin lulan sa dul-an 20 ka mga armado og tag-as nga armas ang direktang nimando sa guwardiya ug sa mga tawo nga anaa sa gawas sa ospital nga pahapaon.

Giingon nga ang duha ka guwardiya niadtong orasa naghatagay sa armas isip turnover of command.

Wala na nakalihok pa ang duha ka guwardiya sa dihang gipangtiunan ug gimanduan nga pahapaon, lakip ang mga staff sa parmasya ug ubang mga nurse, kinsa gipang-ilogan sa ilang mga cellphone.

Lakip ang linya sa telepono ang giputol, hinungdan nga dugay nakatawag og pakitabang sa pulis ang mga anaa sa hospital.

Gihulagway nga sulod sa pipila ka minuto nadungog dayon nila ang mga pagbuto sa armas.

Gipahapa ug gikuhaan usab ang mga cellphone ang mga bana ug kabanay sa mga hospital staff kinsa naka-standby gawas sa ospital.

Gisikop si Ramirez niadtong Hulyo 2017 human nasakpan kini sa kapulisan nga nagkupot ug mga dili lisensyado nga armas de fuego ug mga gamit para suyop og ginadiling drogas.

Nasikop si Ramirez samtang nagserbisyo pa kini sa iyang termino isip konsehal sa lungsod sa Medellin.

Una nang niserbisyo isip mayor sa maong lungsod si Ramirez ug nakahuman kini sa iyang ika-tulo nga termino niadto 2016.

Niadtong 2017, ginganlan si Ramirez ni kanhi Police Regional Office Central Visayas director Jose Mario Espino nga nalambigit sa pagpamaligya ug ilegal nga drugas sa iyang mismong lungsod.

Usa ka buwan human kini gisikop, si Ramirez daling gidala sa Cebu Doctors Hospital (CDH) sa Dakbayan sa Sugbo human ni nasaka ang iyang blood pressure.

Human kini na-admit sa CDH, nipasaka og motion ang abogado ni Ramirez para hangyuon ang korte nga ibutang sa “hospital arrest” ang kanhi mayor tungod sa iyang kondisyon.

Niadtong niaging tuig, gisibya aning maong mantalaan nga giingong nakadawat og “special treatment” si Ramirez samtang na-admit kini sa BMMC.

Gihimakak kini sa kampo ni Ramirez. (FMD sa Superbalita Cebu/KAL sa SunStar Cebu)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph