WA TINGALI wa maungo niadtong mga dekada `70 ug `80 sa mga drama sa radyo sama sa “Diego Salvador,” “Antonio Solitario,” “Sardan: Ang Batang Kahibulungan,” ug uban pa.
Sa maong mga drama nagsugod isip character actor ang bulawanong estorya sa kinabuhi ni Joselo Bulawan Judaya nga mag-60 anyos na sa Agusto.
Si “Selo” o “Gaw,” kun tawagon sa iyang kahigalaan, nagdako sa drama ug entablado tungod sa iyang papa Cerelo nga usa ka script writer. Ang iyang mama Juanita mahiligon usab sa pag-arte. Apan pareho nang nitaliwan sa laing kalibutan.
High school pa lang nakit-an na si Selo nga dunay potential nga mahimong lider ug modani og mga tawo tungod sa iyang dako ug tibuok nga tingog nga maorag DJ.
Tungod usab sa iyang tingog ug isip Top 10 sa ilang klase nahimo siyang corps commander sa CAT (Citizens Army Training).
Apan tungod kay dili motuo og edukasyon ang mga katiguwangan sa unang panahon, pag-gradwar niya sa high school gipatrabaho siya sa iyang papa sa ila ra sang kalubihan sanglit yutaan ang iyang mga ginikanan sa lungsod sa Sogod diin siya natawo ug nidako.
Hangtod nga nakapag siya og hinigugma. Apan dakong supak ang mga ginikanan sa babaye sa ilang relasyon tungod kay naila siyang bugoy ug “adoy-adoy” sa marijuana sa ilang dapit mao nga gitaban ni Selo si “Amalia.”
Nakabaton sila og tulo ka mga anak ug bisan unsa na lay gisudlan niyang trabaho ug negosyo sama sa automotive mechanic ug bakery apan puros nipauli sa wala.
Tuig 2002 daw nawad-an na si Selo og paglaum kay naglisud na siya og buhi sa iyang pamilya ug nisantop sa iyang hunahuna ang magpakamatay.
Sa iyang kaaburido iyang gipalupad ang gimanehong motor nga gigamit niyang delivery sa iyang pan ug didto nahug sa culvert nga dunay daghang kabilya nga gitaroy.
Kahibulongan nga nabuhi pa siya kay matod ni Selo gimilagrohan siya sa balaang batang si Sr. Sto. Nino. Human niadto sunodsunod nang suwerte ang niabot sa iyang kinabuhi.
Karon si Selo usa na ka malampusong developer diin mokabat sa 50 ka ektarya na ang iyang na-develop ubos sa Amalia Ventures Property Corporation nga gipangan niya sa iyang asawa na karon nga si Amalia.
Ang Amalia Ventures sad ang usa sa mga nanag-iya sa Paradise Mountain Hills Resort nga nag-viral sa Buluang, Compostela, Cebu. Ang pinakabag-o nilang proyekto ang 10-hectare nga Marco Heights ug Alexa Ville sa Cabangahan, Consolacion.
Si Selo duna nay pito ka mga luhong sakyanan ug ubang mga personal nga property ug usa sad siya sa CEO sa ABPI (Among Balay Pinuy-anan Inc.).
Mga titulado na ang iyang duha ka mga anak ug ang kinamanghuran naa na sa college ug puros dunay kaugalingong mga yuta ug balay sa Tayud, Liloan.
Ang iyang kinabuhi daw nahisama usab sa drama sa radyo ug entablado nga tugob sa pakigbisog ug pagpanimpad.
Joselo Bulawan Judaya, Sssuper Ka!!!
Nganong magpakamatay man ka?
Di na man ko kabuhi sa akong pamilya maayo pang maghikog. Mao ning dunay tahi akong ulo kay nabuak man ni. Pero after ato naka-realized ko nga dakong sayup ang akong gibuhat. Kay kanang magkalisudlisud gud ka kapit ka sa patalim, apiki kag utok.
Giunsa ka pag-milagro sa Sto Nino?
Dunay nihunghong nako nga, “di pa nimo panahon. I-surrender ang imong kaugalingon sa Ginoo kay tabangan ka niya.” Niadto ko sa simbahan sa Sto. Nino ug didto nakita gyud nako nga nisiga ang iyang imahe. Ingon sa pari kay gimilagrohan ka, blessed ka. Pero lihok tawo kay tabangan ko ikaw. Isip pasalamat sad maghatagan kog ‘tithes’ sa mga simbahan ug sa mga madre.
Diin man nagsugod ang imong suwerte?
Nahalinan kog yuta ug naka-commission. Nahigam kay milyon ang commission. Didto nagsugod. Naka-realized ko nga mao diay ni akong linya. Then dunay nipautang nakog duha ka ektarya sa Casili. Mao toy first venture namo sa akong partner sa ABPI.
Nganong supak man ang parents ni Amalia nimo?
Bugoy man ko sa una. Tanan bisyo naa nako. Rebelde man ko sa among pamilya. Tinuod gyud nang gisulti ni Presidente Duterte nga basta drugs di na ka kahibawo sa imong gipangbuhat. Kanang “Anak” ni Freddie Aguilar ako nang kantahon pirme sa buhi pa si tatay kay nagbasul gyud ko sa akong gibuhat.
Unsay ligasiya nga gusto nimong ibilin sa imong pamilya ug sa staff sa Amalia Ventures?
Dili hayahay ang hunahunaon kundi kon unsaon nimo nga makabarug ka. Ako silang gi-challenge nga di kaha mo mauwaw sa inyong kaugalingon inig abot sa panahon nga ako gani high school graduate ra nakapabarog og ingon ani, unya kamo hinuon mopordoy mo sa akong gipabarog. Kinahanglan kayod ta. Kayod gyud. Ako silang gipakita kon unsa ang pagsandurot, maghugpong ta. Mada ba diay nato ang katigayunan inig kamatay nato di man. Ang importante ayuhon og pagda aron di magkalisudlisud unya.