WALA’Y kasayuran ang Boston Celtics kon asa karon ang ilang pambatong pointguard nga si Kyrie Irving.
Si Irving, kinsa puwede nang makalugnot sa iyang kontrata sa Celtics karong Hunyo 30 aron mahimong free agent, wala na’y kumonikasyon sa kadagkuan sa Celtics ning panahuna.
Gumikan niini, adunay katahap sila si team president Danny Ainge ug head coach Brad Stevens nga nagplano na si Irving nga mobalhin sa laing team.
Adunay hugonhugon sa miaging semana nga nangandam na si Irving aron mopirma og kontrata sa Brooklyn Nets human nga naputol ang panaglambigit niini sa iyang bugtong professional agent.
Dili pa lang dugay, gikataho nga nagtagbo sila si Irving ug Golden State Warriors forward Kevin Durant ug nagsabot nga mag-uban sila sa usa ka team, dili sa Celtics ug dili sab sa Warriors.
Gituohan nga mag-uban sila si Irving ug Durant sa Brooklyn sa ugma damlag.
Si Durant dili pa makaduwa sa sunod season sa (NBA) gumikan kay nagkinahanglan og taas nga panahon ang pagpaalim sa iyang angol nga torn Achilles.
Ang laing dekalidad ug bantugang magduduwa nga si Al Horford dili na sab interesado nga mopirma og bag-ong kontrata alang sa Celtics.
Gikataho sa ESPN nga wala magkasinabot si Horford ug ang Celtics kabahin sa bag-ong kontrata sa beteranong magduduwa.
Sa laing bahin, aduna sab taho nga nagplanong mobiya si All-Star pointguard Chris Paul sa Houston Rockets.
Si Paul adunay dili maayong relasyon sa labing sinaligan sa Rockets nga si James Harden ug gituohan nga kini maoy hinungdan nga nagtinguha na si Paul nga mobiya.
Basi sa tinubdan sa Yahoo Sports, mihangyo na si Paul sa Rockets management nga magpa-trade.
Nabantayan nga nagkagrabe ang panagbangi nila ni Paul Harden ug wala kini nagtingogay sa miaging duha ka mga buwan.
“There’s no respect at all, on either side,” matod ni sa tinubdan sa Yahoo Sports. “They need to get away from one another. Chris doesn’t respect James’ standing in the league, and James doesn’t respect the work Chris has put in to this point.” (Reuters, ESL)