MAKIGBATOK ang Cebu Landmasters / University of San Carlos (USC) Warriors sa Tough Gear / Cebu Institute of Technology University (CIT-U) Wildcats sa main game karong gabii sa Cebu Schools Athletic Foundation Inc. (CESAFI) 2019 Partner’s Cup college division sa USC gymnasium.
Ang Warriors kasamtangang nagtangag og 2-1 nga rekord samtang ang Wildcats wala pa’y daog sulod sa tulo ka mga duwa.
Sa premirong sangka, nga sugdan sa alas 5:00 sa hapon, magpinaksitay ang Hotel Fortuna-University of Cebu (UC) Baby Webmasters ug University of Southern Philippines Foundation (USPF) Baby Panthers sa high school division.
Sa laing bahin, gisanta sa Universioty San Jose-Recoletos (USJ-R) Jaguars ang kainit sa JoeMang’s Surplus-UC Webmasters pinaagi sa 82-79 nga kadaugan niadtong Martes sa college division.
Ang Jaguars mao ang nakaputol sa tulo ka sunodsunod nga kadaugan sa Webmasters.
Kalmadong gipasulod ni forward Elmer Echavez ang iyang duha ka freethrows aron hatagan ang Jaguars og 82-79 nga labaw sa nahabiling 3.5 segundos.
Sa return play, nasipyat si Webmasters guard Darell Shane Menina sa iyang despiradong three-point attempt.
Ang Jaguars gipangulohan ni Cameroonian student-athlete Arnold Azangue pinaagi sa iyang 17 puntos samtang ningtampo og 14 puntos matag usa sila si Echavez ug Renz Solomon.
Si Tosh Sesay nimugna og 18 puntos aron panngulohan ang Webmasters samtang ningtunol og 15 puntos matag usa sila si Menina ug Tristan Albina.
Sa high school division nga sangka, ang Tough Gear-Southwestern University (SWU) Baby Cobras ningmakmak sa University of Cebu-Lapu Lapu and Mandaue (UCLM), 68-55. (ESL)