WA motugot si outgoing Lapu-Lapu City Mayor Paz Radaza nga kahatagan og permit ang Kapa Community Ministry International nga mopahigayon og duha ka adlaw nga rally sa City Sports Complex nga nahimutang sa city hall compound.
Base sa letter request nga gipadala ug pinirmahan ni Ritchie Largo, Kapa member, nga gihatod sa buhatan ni Radaza kagahapon sa buntag, Hunyo 19, 2019, sila nihangyo nga mogamit sa complex alang sa duha ka adlaw nga prayer rally nga gikatakda unta karong adlawa ug ugma, Hunyo 20 – 21.
Ang rally giulohan og “’One Voice and One Heart’ Ibalik ang Kapa” ubos sa tema nga “Nagkakaisang Pilipino para sa mga mahihirap.”
Apan sa dihang nadawat ni Radaza ang suwat, iya kining gibasura sa kabalaka nga momugna og kagubot ang kalihokan ilabi na nga modagsa ang daghang mga miyembro.
“This kind of thing (investment scheme) kinahanglan nga duna gyuy proper security (plan). Maglamok-lamok pa na hinuon diha, ang mi-isyu sa permit na hinuon maoy madaot,” kabalaka ni Radaza.
Dugang pa ni Radaza nga bisan sa Plaza Rizal, sa Barangay Poblacion nga publikong dapit diin mamahimong makapahigayon og rally, di sab siya motugot.
Giklaro sa opisyal nga wa magpasabot nga iyang gidid-an ang publiko nga maka-gamit sa facility sa siyudad apan buot lang niyang masiguro ang seguridad ilabi na ang pagkuwestiyon sa legality sa pundok.
Nasayran sab ni Radaza nga una nang nisuway og hangyo ang Kapa sa ubang local government units (LGUs) apan giingong pulos mibalibad.
Sa labing uwahing kalambuan kabahin sa Kapa nga gi-ila nga usa ka investment scheme, ang mga tag-as nga opisyal niini ang mag-atubang og reklamong kriminal sa Department of Justice human nga ang Securities and Exchange Commission niduso og reklamo batok sa organisasyon nga giingong ‘illegal’ investment scheme.
VAULT WA MAABLIHI
Onse ka adlaw human gisunog ang buhatan sa Kapa Community Ministry International sa lungsod sa Compostela, wa pa gihapon mopatim-aw sa Compostela police station ang mga opisyal sa kapunongan.
Matod ni Police Captain Ian Macatangay, hepe sa Compostela Police Station, wa pa usab maablihi ang dakong vault nga gikustodiya sa ilang buhatan.
Bugtong ang order sa korte ang makaabli sa maong vault aron masayran kon unsay sulod niini.
Una nang nangangkon kadtong in-house nga mga empleyado sa Kapa nga adunay dakong kantidad sa kwarta ang naa sa sulod sa vault.
Wa na usab mo kooperar ang 21 ka mga empleyado sa Kapa hinungdan nga sila naglisod sa imbestigasyon.
Ang mao nga mga kawani namasangil nga gitulis sila sa di momenos napulo ka armadong mga tawo.
Lakip sa giingong gikuha sa mga armado ang gamay nga vault nga adunay gibana-bana P8 million gikan sa donation sa mga miyembro niini.
“Wala na man sila mo cooperate katong 21 ka buok. Ingon sila nga nawad-an silag mga butang pero kon naa tay mga pangutana nila, dili na man sila motubag,” matod ni Macatangay.
HAYAN MOKIHA
Aduna nay lima ka mga miyembro sa Kapa ang ningdangop sa police station sa Compostela.
Ang lima ningpahibawo nga mo reklamo sila kon di tumanon ang saad sa management nga ulian sila sa ilang donation.
Giingong human sa 10 ka adlaw nga gi raid ang ilang opisina, ibalik kini sa mga nakadonar na.
Apan kon di kini matuman, mosang-at silag reklamong estafa sa korte batok sa Kapa.
“Naghulat sila nga mo lapse tong 10 days nga gisaad sa ilaha nga ma return ang ilahang kwarta. Ang katong 10 days mahuman karong June 21. So, mao to among gihuwat. Kon dili sila maulian kay mao may gipaasa sa ilaha,” dugang ni Macatangay.
Wa lang una nganli ni Macatangay kon kinsa ang maong mga membro sanglit mihangyo usab kini.
Giingon niya nga daghan pa ang mo reklamo kon pakyas ang Kapa sa pag uli sa ilang kwarta.
Adunay usa ka membro nga naka donate og P600,000 sa pamasin nga inig abot sa usa ka tuig maka dawat siyay kapin sa P6 million nga maoy saad sa Kapa kanila.