MIRETIRO si Ricky Vargas isip presidente sa Philippine Olympic Committee (POC).
Gibutyag ni Vargas ang iyang desisyon sa miaging adlaw sa atol sa panaghugpong sa Olympic body executive board sa opisina sa POC sa Pasay City.
Si Clint Aranas, kinsa maoy archery association head ug bag-ong spokesman sa POC, maoy mikompormar sa desisyon ni Vargas.
“We had a good meeting but at the end of the day, our president decided to tender his irrevocable resignation and we respected that,” matod ni Aranas sa interbyu sa Spin.ph.
Ang labing unang bise presidente sa POC nga si Joey Romasanta maoy mihulip lang Vargas.
Si Vargas milingkod ning maong posisyon niadtong Pebrero 2018 aron hulipan si Jose Peping Cojaungco, sulod sab sa 13 ka mga tuig nga naglingkod ning maong posisyon.
“After much introspection, I have determined that there would be other sports leaders who would have the time and inclination needed to lead the POC more effectively,” opisyal nga pamahayag ni Vargas.
Subay niini, gipasalig ni Romasanta di maapektohan ang preparasyon sa pag-host sa nasod sa ika-30 nga Southeast Asian Games.
Gani gimandoan gilayon ni Romasanta si kanhi POC secretary general Steve Hontiveros sa pagpatawag og SEA Games Federation Council meeting alang sa briefing sa 10 ka mga nasod kalabot sa mga kalambuan sa preparasyon.
Matod niya nga kinahanglan mapangitaan gilayon og igong solusyon taliwala ning kalit nga kausaban ug sa samang higayon iyang gihulagway nga wa gyud matarong ang preparasyon tungod sa pipila ka mga legal issue.
Gitinguha karon sa POC nga makuhaan ang mga events nga ipahigayon sa umaabot nga SEA Games. Kini tungod kay lisod alang kanila ang pag-host og 56 ka mga sporting events ning lima na lang ka buwan ang nahabilin sa dili pa ang SEA Games.
“We are ready to pick up the pieces,” matod ni Romasanta, kinsa mibutyag nga ang unang POC general assembly himuon karong Hunyo 25 didto sa Government Service Insurance System gymnasium.
Mohimo usab og courtesy call si Romasanta ngadto ni PSC chairman Butch Ramirez.
“We’re moving as fast as we can,” ni Romasanta pa. (JBM, ESL)