NATUGAW ug nabuak ang kamingaw niadtong miaging tungang gabii sa dakong wanang sa katubhan sa Barangay Luy-a sa lungsod sa Medellin diin nahimutang ang Bomedco Medical Center sa dihang nabati ang sunod-sunod nga mga buto-buto sa armas de fuego pasado alas 11 sa gabii. Sa paghunong sa mga buto-buto nakit-ang nagbuy-od na si kanhi Medellin mayor Ricardo ‘Ricky’ Ramirez sulod sa comfort sa hospital room diin siya taud-taud nang na-confine. Nakaangkon og daghan samad pinusilan sa iyang lawas si Ramirez.
Matod ni Police Major Audie Pelayo, ang hepe sa Medellin Police station, sa akong interview sa dySS Super Radyo, gibana-banang 15 ka mga armadong tawo nga sakay sa upat ka SUV (sport utility vehicles) ang mihunong sa hospital premises ug dayon sulod sa hospital human dis-armahi ang guwardiya ug gipahapa ang mga nurse nga nag-duty.
Usa ka nurse ang gipugos sa armadong mga tawo nga naka-bonnet aron motoltol sa kwarto diin na-confine si Ramirez. Gipaarakan ang pultahan ug dayon gidis-armahan usab ang usa ka Bureau of Jail Management and Penologoy (BJMP) personnel nga nagbantay sa kanhi mayor.
Posibleng nakakamang pa ang biktima sa CR gumikan kay didto man makit-i ang iyang patay’ng lawas nga natusak-tusak sa mga bala.
Si Ramirez napriso sa Medellin District Jail human maronda ang iyang panimalay niadtong 2017 diin nakuhaan og nagkalain-laing kalibre sa armas de fuego ingon man drug paraphernalia. Apan wala magdugay sa prisohan kay na-confined man sa hospital tungod sa mga sakit nga gihambin.
Dugay nang gidudahan nga tiggamitan og illegal nga drugas si Ramirez bisan niadtong mayor pa siya. Apan gumikan lagi kay inpluwensiyado walay nakahilabot. Hangtod nga niadtong 2017, sa dihang gihingusgan na ang kampanya batok sa illegal nga drugas sa paglingkod na ni Presidente Duterte, diha na siya madakpi. Siguro na-identified na siya nga usa sa mga “narco-politician.” Pero dili na siya makatubag ning maong akusasyon. Biktima kaha si Ramirez sa extra-judicial killing (EJK)? (bobbygnalzaro@gmail.com)