GIPAHIBAWO sa Land Transportation Office (LTO) 7 nga mahimo nang maka-renew sa ilang driver’s license ang mga drayber atol sa adlaw nga Sabado.
Sugod Hunyo 22, ang LTO 7 ug mga rehiyon lukop nasod moatiman modawat na sa padong expires nga lisensya didto sa Driver’s License Renewal Offices nga nahimutang sa shopping malls.
“Good news! Starting this month June 22, you can renew your driver’s license even on Saturdays at all LTO Driver’s License Renewal Offices (DLROs) located in malls nationwide,” matod sa social media page sa LTO-7.
Si LTO 7 Regional Director Victor Caindec nipahibawo nga mahimo na nga maka-renew sa ilang driver’s license bisan duha pa ka buwan gikan sa petsa sa paghupas sa ilang lisensiya.
Tuyo niini mao nga mahatagan og igo nga panahon ang mga driver’s license holder nga makabag-o sa ilang lisensiya ug malikayan ang mga penalty.
Si Caindec niingon nga lakip sa mga shopping malls nga adunay DLRO’s mao ang Island Central Mall sa Lapu-Lapu City, SM Seaside City, SM City Cebu, Robinson’s Fuente, Island City Mall sa Bohol, Alturaz sa Tagbilaran City, Robinson’s Place sa Dumaguete City.
Giklaro ni Caindec nga renewal sa licensiya ug pag-isyu og student permit ang transaction sa adlaw nga Sabado ug walay transaksyon sa paglukat og bag-ong lisensiya.
Ang Department of Transportation (DOTr) diin nahisakop ang LTO, niumol og memorandum circular no. 2019-2167 nga gipirmahan ni Assistant Secretary Edgar Galvante may labot sa maong katuyoan diin ang mga DLRO’s nga naa sa mall moabli na sa adlaw sa Sabado.
Magsugod ang office hours sa DLRO’s sa higayon nga moabli sab ang mga shopping malls sa buntag ug molanat hangtod alas 5:00 sa hapon. (PAC)