PAMULTAHON na unya ang mga tagdumala o tag-iya sa mga land transportation terminal, station, stop, ug roll-on / roll-off terminals nga way tarong nga banyo, magpabayad kon magpagamit sa banyo, o way lactation station.
Base sa bag-ong balaoad nga Republic Act 11311, nga gipirmahan ni Presidente Rodrigo Duterte, kinahanglan usab ang libre nga wifi access sa matag terminal o station sa nagkadaiyang pampubliko nga transportasyon.
“The state recognizes that the right of every establishments to a fair return of investment carries with it a corresponding social responsibility to provide adequate facilities for the comfort of its clientele,” tipik sa maong bag-ong baload.
Ubos niini, nga gawas nga adunay banyo ang terminal, kinahanglan nga limpyo kini, hamugaway ug anaa ang gikinahanglan susama sa tissue, tubig, sabon, ug uban pa.
Gawas niini, gibawal na usab ang terminal nga magpabayad kon magpagamit sa ilang banyo.
Kinahanglan ra nga ipakita ang ticket sa mogamit niini.
“Provided, however, that the provisions of this Act shall not apply to separate, well-appointed or deluxe sanitary facilities,” tipik sa section 5 sa maong balaod.
Mag-atubang og tag P5,000 nga multa ang tag-iya o tagdumala sa terminal o station kon makalapas.
Kini nagpasabot nga kon wa siya niining tulo, moabot sa P15,000 iyang multa.
Ang usa sa busy nga bus terminal sa Sugbo nga Cebu South Bus Terminal, bisan pa karon pa kini nalusot nga balaod, anaa na niini nga mga pasilidad.
Matod sa operations manager sa CSBT, Jonathan Tumulak, tulo na ka provider ang anaa nila sa ilahang wifi samtang anaa na usab sila’y limpyo nga banyo.
Sa kasamtangan, gi-renovate na usab ang ilang clinic nga maoy mamahimong lactation station usab nila sulod sa maong terminal. (HBL)