GIPAAK sa hubog ang duha ka mga barangay tanod dihang niresponde niadtong nilabay nga adlaw diha sa Zone-3, Barangay Bonbon, siyudad sa Cagayan de Oro.
Ang mga barangay tanod naila nga sila si Ariel Baal, 34, ulitawo, ug Ansel Saa, 65, minyo, nga pulos residente sa maong dapit, samtang ang gireklamo naila nga si Jerry Boluche, dunay kaipon ug residente ra usab sa maong dapit.
Sa nahipos nga impormasiyon, giingong gitaho sa mga residente si Boluche tungod kay lango kini sa ilimnong makahubog ug naglasong, hinungdan nga gikabalaka sa mga residente.
Dali usab nga girespondehan sa mga tanod apan wala kini nagpatoo ug gipaak niini ang mga tanod ug gituklod pa rason nga nakaangkon kini og mga bun-og.
Samad pinaakan sa wala nga bukton ang naangkon ni Baal ug si Saa dayon gitukmod pa kini sa bungbong sa usa ka panimalay, hinungdan nga nakaangkon og bun-og.
Ang maong insidente ang nakatala na sa buhatan sa kapulisan ug giduso na sa Barangay Lupon alang sa tukmang aksiyon.