NABIYAAN ang mabdos nga asawa human ang bana niini nga sakop sa Citizen Armed Forces Geographical Unit (Cafgu) military auxiliary forces ang giputlan og ulo sa gitouhang sakop sa rebeldeng New People's Army (NPA).
Nadiskubre ang patay nga lawas sa 24 anyos nga si Ryard Badiang, residente sa Lanuza, Surigao del Sur.
Napulo ka metros gikan sa iyang lawas, narekober ang ulo niini didto sa hilit nga dapit sa Banahaw, Maitum, Tandag City.
Si First Lieutenant Jonald Romorosa, ang civil military officer sa 36th Infantry Battalion, niingon nga si Badiang lakip sa walo ka mga indibidwal nga gidagit sa armadong grupo nga gitouhang NPA niadtong Mayo 30. Gani gibuhian ang pito, apan walay labot si Badiang.
Nasayran nga si Badiang kanhi sakop sa NPA nga dihang mibalik sa sabakan sa gobyerno, nahimong usa ka miyembro sa Cafgu.
Gani, atol sa pagkadagit niini, anaa kini kamulo sa iyang trabaho samtang kadtong laing pito sa gidagit ang igo lang nagbalsa niadtong tungora.
Positibong naila sa mabdos nga asawa niini si Badiang, kinsa anaa na sa pagkadugta apan nailhan gumikan sa gisul-ob nga sinina ug relo.