DILI tiaw ang kadismaya ug kasakit nga gibati sa mga bakwit nga lumad nga Tagbalunon gikan sa Sitio Mikamansi, Barangay Banglay, lungsod sa Lagonglong, Misamis Oriental, human sa usa ka tuig nga pagpundo sa Capitol Park gipapahawa sila niadtong Martes, Hunyo 18, sa hiniusang pwersa sa mga personahe sa Kapitolyo Probinsyal.
Nanghilak ang mga bata lakip ang katigulangan ug nagmagahi nga mohawa sa ilang gipuy-an apan napugos gyod sa pagbiya human walay gibilin nga mga gamit ug tanan gibaklas ug gisakay sa dumptruck ug gidala sa lungsod sa Lagonglong.
Sa kasamtangan, anaa karon nagpasilong sa UCCP Church ang mga bakwit.
Ang mga payag o bag-ong balay nga ilang gitukod ang gipang guba pinasikad sa mando ni Barangay 27 Kapitan Rey Dante human nakasupak kini sa Official Building Office (OBO) kay wala kini permiso gawas nga ang Capitol Park usa ka recreational area.
Tanan nga mga butang sa bakwit gipanghakot og dagkong dumptruck sa kapitolyo ug pagadalhon didto sa lungsod sa Lagonglong kon asa nagpaabot ang local nga kagamhanan aron sab sila maplastar.
"Dili kami mopahawa diri hangtod dili kami atubangon ni Governor Bambi Emano nga nagpasalig papuy-on mi dinhi bisan pa sa pila ka katuigan," kini ang sulti ni Datu Raymundo Ayuma sa Tagbalunon.
Ang ilang spokesperson nga si Jhunley Ilogon niingon sab nga bisan pa sila gipapahawa, dili sila mouli sa Lagonglong ug magbalik-balik gyod gihapon sa Kapitolyo kay mipasalig sa Lagonglong LGU nga walay katumanan gawas pa ang pagpaangkon-angkon kanila nga sakop sila New People's Army nga maoy hinungdan mga mahasi.
"Papahawaon man mi nila karon diri. Mobalik gihapon mi hangtod dili matubag ang among demanda nga papahawaon ang mga sundalo sa Mikamansi," matud ni Ilogon.
Sa iyang bahin sab ni Pastor Rolando Abejo, kinsa leader sa Movements Against Tyranny, siya niingon nga pagyatak sa katungod sa bakwit ang gihimo sa mga trabahante sa Kapitolyo.
"Dismayado kaayo kami sa lakang sa kagamhanang probinsyal diin atong makita nagkaubos ang kalidad sa ilang utok kay klaro ang gihimo sa mga lumad pagsiguro sa ilang kinabuhi sa umaabot ting-ulan," matud ni Abejo.
Nagbahad silang mopasaka og kasong abduction tungod sa pagpugos ogpasakay sa mga bakwit.
Pagpangawat tungod sa pagbitbit sa ilang mga gamit ug giingong pag-abuso sa mga kabataan human sila nangasakitan.