PAG-UGMAD sa edukasyon sa kabataan maoy sentro ug panglantaw sa Misamis Oriental Provincial Early Childhood Care and Development (ECCD).
Sa pagpangulo ni Maryden Ocot, kinsa department head sa ECCD, gihingusgan niining mapalambo ang pagtoon sa mga kabataan hilabina gyod sa mga bulilit kon hain dinhi kinahanglan sugdan ang pagmatuto kanila nga ilang madala ug matun-an hangtod sa ilang pagdako.
Kung ang mga elementarya ug high school adunay Brigada Eskwela karong tuiga, gilusad sa ECCD ang Bayanihan Bulilit usa ka programa nga moila sa mga child development center o day care centers nga nakitaan og mga kakulangon nga adtoan sa mga personahe sa ECCD, mga gikoordinar ug mitabang nga mga organisasyon sama sa Provincial Youth Development Office (PYDO), Sangguniang Kabataan sa Probinsya, CdeO Eagles club ug uban pa aron i-make over, dalhan ug mga gamit lakip mga dulaan.
Giaghat sab ni Ocot ang pipila ka organisasyon nga moduyog niini nga programa.
Ilang tabangan ang center sa pagpagwapa sa ilang tunghaan, pagpintal, paghatag og mga panginahanglanon sulod sa tunghaan sama sa trash can, kurtina, floormat ug uban pa. Adunay gitagana ang buhatan og P300,000 alang niining proyekto karong tuiga nga suportado ug aprobado ni Governor Bambi Emano.
"Nagtoo mi nga bisan sa gamay nga among natabang, dako gyod kaayo kini og kalambigitan sa pag-ugmad sa edukasyon sa kabataan ug nalipay kaayo mi nga daghan ang midungog sa among kausa kay diri naa mi mga partners nga interested entities groups who are also willing to help us," matud ni Ocot.
Upat ka ECCD center ang recipient ning tuig sa Bayanihang Bulilit ug kini naggikan sa lungsod sa Salay, Balingoan, Naawan ug Initao.
Dugang ni Ocot nga nagpokos sila karon panahona sa kurikulom nga learn and play session, hinungdan nga kadtong bangko ug lamesa ilain kini aron lamang gamiton sa feeding.
"The rest of our sessions pwede ang mga bata maghigda because that will also be a great factor nga maka contribute sa every cognitive development for every child," dugang niini.
Sa pagkakaron, adunay mokabat 735 ka mga existing day care center sa tibouk probinsya labina kon prayoridad sa kapitan ang day care center matukod gyod kini sa kabarangayan.