MAGUINDANAO PROVINCE -- Samdan ang duha ka magsuong menor de edad human giistraping sa armadong grupo ang ilang balay alas 9:50 sa gabii, Martes, Hunyo 18.
Mga biktima nagpangedaron pa lang og 10 ug 12 anyos ug nanimuyo sa Barangay Nabundas, Datu Odin Sinsuat sa maong probinsiya.
Gibutyag ni Maguindanao Police Provincial Office director Colonel Ronald Briones nga natulog ang mga biktima, uban sa ilang ginikanan sulod sa ilang balay.
Apan kalit lang gipaarakan sila sa wala mailhing mga armadong lalaki gamit ang M16 Armalite rifles ug daling nisibat.
Mga samdan gihatud sa ilang pamilya ngadto sa Cotabato Regional and Medical Center sa Cotabato City ug giingong talandugon ang ilang kahimtang.
Sa pagsuwat ning balita, kapulisan sa Datu Odin Sinsuat Municipal Police Station padayon nga nagsusi sa motibo sa pagpang-arak sa mga armadong grupo sa balay sa mga biktima. (Edgar E. Fuerzas)