COTABATO CITY -- Wa damha sa drayber sa van nga sa iyang pagpangihi sa sulod sa terminal, kadto na ang katapusan sa iyang kinabuhi human gipusil sa wala mailhing suspek.
Nahitabo ang pagpamusil alas 6:15 sa gabii, Martes, Hunyo 18, sa Alnor Bangsamoro Terminal sa Barangay Rosary Heights 9 sa dakbayan.
Samtang ang biktima giila nga si Bebot Salilama Sibal, 40, minyo, molupyo sa Barangay Tran, Lebak, Sultan Kudarat.
Nasayran gikan sa taho sa Cotabato City Police Office nga nangihi lang unta ang biktima sa kasilyas sulod sa nahisgutang terminal apan giduol sa usa ka wala mailhing lalaki ug dayong gipusil sa ulo ug dughan.
Ang suspek dali sab nga nisibat padulong sa naghuwat nga motorsiklo nga gimaneho sa iyang kauban ug dayong paturatoy paingon sa hilit nga dapit sa dakbayan.
Wala na madala pa sa balay tambalanan ang biktima kay on the spot kining nakabsan sa kinabuhi.
Personal nga atraso ang gilantaw sa mga awtoridad nga motibo sa pagpusil patay sa biktima. (Edgar E. Fuerzas)