HILABIHAN ang kasuko sa usa ka saleslady kinsa midangop sa buhatan sa Talomo Police Station kay iyang ipa-blotter ang iyang ka boardmate nga lalaki alas 7 sa gabii niadtong Martes, Hunyo 18.
Saysay sa blotter sa Talomo PNP nga mipatala ang usa ka Ligaya (bansagon gitago), 32-anyos, kinsa nag-abang og boarding house sa S.I.R, Phase 1, New Matina, Davao City.
Si Ligaya nagbutyag nga samtang naligo siya sa banyo sa ilang gi-rentahan, ang suspek nga si Ricardo (bansagon gitago) 34-anyos, nasakpan sa ilang ka boardmate nga nalingaw og baklad.
Nasayran nga gawas sa pagpunay og baklad ni Ricardo sa hubo nga lawas ni Ligaya, nag-video sab kini gamit ang cellphone.
Dihang okupado si Ricardo sa iyang gihimo, wala niini mamatikdi nga nasakpan siya sa laing ka boardmate nga higala ni Ligaya, hinungdan nga nabisto kini.
Dali sab dayon nga misulod si Ricardo sa iyang kuwarto apan wala na kini kabalibad sa pasangil kaniya human dunay testigo sa hitabo.
Naguol si Ligaya basin unya og nakatag na ang iyang video sa social media ug basin unya og napasa-pasa na kini.
Hinuon giangkon sa suspek nga nag-video siya apan iyaha sab dayon kining gi-delete.
Ang kaso gihandus na sa barangay aron didto sila mahusay.