SUPERBALITA CEBU

Ramirez killers paspas, naka-vest

PASPAS ang mga lihok sa labing minos 15 ka killers ni kanhi Medellin mayor Ricardo Ramirez.

Ang kinatibuk-ang operasyon nilanat lang og 2-3 minutos samtang ang pagpatay ni Ramirez mga segundos lang.

Mao kini ang paghulagway sa mga kawani sa ospital ug bugtong jail officer nga nagbantay sa kanhi mayor sud sa iyang lawak sa Bogo-Medellin Medical Center sa Barangay Luy-a, Medellin, kalabot sa operasyon batok ni Ramirez. Ang pagpatay ni Ramirez gihulagway nga nilanat lang og segundos.

Gawas nga paspas, pulos usab nakataptap ang mga nawong ug nagsul-ob og bullet proof vest ang mga killer.

Kadaghanan kanila nagbitbit og M4 Carbine rifle nga maoy sagad gigamit sa militar ug kapulisan isip long firearm.

Nadunggan sa mga tawo ang pinulongan nga dunay Cebuano, Tagalog ug Ilonggo.

Ang tambalanan gibana-bana nga dunay gilay-ong 2.5 kilometers gikan sa police station.

Ang lawas ni Ramirez, 55, natusaktusak sa mga bala dihang napalgan sulod sa kasilyas sa iyang private room sa Bomedco.

Ang pagsulong nahitabo mga alas 11:50 sa gabii sa Martes ug nadawat sa kapulisan ang alarma alas 12:01 sa kaadlawon sa Miyerkules, Hunyo 19.

MISULONG

Sa pasiuna nga pakisusi sa Medellin Police Station, ubos sa hepe nga si Police Major Audie Pelayo, samtang nag-turnover ang outgoing duty guard ngadto sa incoming, tulo ka mga sports utility vehicle ug usa ka hatchback nga sakyanan, ningsulod sa compound sa tambalanan.

Mga sakay nga armado og kasagaran tag-as nga armas, gibana-bana sa mga saksi nga moabot og 15 ka mga tawo, ningkanaog sa mga sakyanan.

Ang tanan puros naka-bonnet, samtang naka-bullet proof ug kasagaran mga naka-short pants.

Nidirekta kini mando sa duha ka mga guwardya sa paghapa ug gikuha ang ilang mga armas ug cellphone.

Lakip sa gipahapa ug gipangkuhaan og cellphone ang mga lalakeng nagpaabot sa ilang asawa o kabanay nga staff sa hospital mag-off duty na unta.

Ang walo sa armadong mga tawo ninglahos sa buhatan sa mga nurse ug ubang staff, lakip na sa pharmacy, dayon sila gipahapa ug gikuha ang ilang cellular phones.

Samtang ang uban nagpabilim sa gawas isip perimeter guard ug nagbantay sa mga gipahapa sa gawas.

Lakip ang linya sa telepono sa tambalanan giputol sa mga mamumuno. Dugang ni Pelayo, upat na lang ka mga lalake ninglahos sa nurse’s station.

Nikuha ug nagpatudlo kini sa in-charge nurse kon asa ang lawak ni Ramirez.

KALIT

Saysay ni Jail officer 1 (JO1) Renan Pableo, kinsa ang naka-schedule nga bantay sa kanhi mayor, alas 7 sa gabii hangtod sa alas 7 sa buntag, nanagtan-aw og telebisyon sila ni Ramirez uban ang usa ka Shaira Abdul.

Si Abdul uyab sa kamanghurang anak ni Ramirez, kinsa maoy nagbantay ug gisaligan sa pagpamalit sa kinahanglanong tambal.

Sa dihang kalit na lang ilang nadunggan ang buto-buto sa armas sa pultahan sa lawak.

Gisundan kini sa kusog nga pagtulod ug pagguba sa door knob. Daling nisulod ang upat ka mga lalake, ang duha tag-as og armas samtang ang laing duha short firearms apan usa dunay silencer. Dali nga nakadagan si Ramirez ug Shaira sulod sa pansayan ug didto nitago.

Ang usa nga nagdala og taas nga armas dali nakation kang Pableo ug nikuha sa iyang armas, lakip na sa iyang backpack diin anaa ang iyang cellphone, kwarta ug uban pang personal nga butang.

Samtang laing tulo ka armado ningdali sa pag-apas kanila ni Ramirez ug Abdul.

Gituklod pa ang babaye una gipusil sa makadaghang mga higayon si Ramirez.

“Dali kaayo ang panghitabo. Segundos lang. Murag wala abti og minuto. Nadungog nako nagrakrak gyud, murag gi-automatic (ang armas), gihurot ang bala,” saysay ni Pableo sa Superbalita Cebu. Si Pableo wa pay buwan sukad na-assign sa Medellin District Jail.

Human sa pagpatay kang Ramirez, dali nga nanibat ang mga killes agi sa access road sa Bomedco padung sa National Grid Corp. of the Philippines (NGCP), pagawas sa national road, ug diretso sa habagatang bahin sa probinsya.

Nakuha sa crime scene ang 35 ka empty shells sa 5.56 ug 9mm nga mga armas.

Usa ka metal fragment, usa ka deformed fired bullet ug usa ka fired bullet ang lakip sa nakuha.

Aduna usay nakuha nga mga drug paraphernalia nga usa ka improvised tooter with burner, usa ka buak na nga improvised burner ug green nga lighter sud sa lawak ni Ramirez.

GAMIT SA PAGSUYOP

Giangkon ni Pelayo nga mga gamit kini sa illegal nga drugas.

Apan si Pableo ang nitug-an nga sa ikaduhang’ higayon pa lang siya nga nakabantay sa mayor diha sa tambalanan, wa kini gitugutan nga makahimo paggamit og ilegal nga drugas.

Wa usab siya nakabantay nga adunay drugas sa lawak.

Gitug-an usab ni Supt. Gil Inopia, warden sa MDJ, nga gituyok niya ang kapin 20 nila ka nga jail officer diha sa pagbantay kang Ramirez sa tamabalanan matag 12 ka oras ug dili permanente ang mga mobantay.

Ug aron sa pagwagtang sa pagduda nga posibleng lakip ang jail officer sa posibleng paggamit og drugas, Miyerkules sa buntag, Hunyo 19, gipaubos dayon kini niya sa drug test. Pinaagi sa muncipal health unit, masuta ang resulta, Huwebes, Hunyo 20.

MOTIBO

Samtang usa sa gisunod nga motibo sa pagpatay sa mayor, ang kalabot sa giingong pagkalambigit niini kaniadto sa ginadiling drugas.

Dugang ni Pelayo nga tanang anggulo ilang gisubay, lakip na ang personal grudge tungod sa negusyo niini o sa iyang kanhi pagkamayor sa lungsod.

Apan gitug-an ni Pelayo nga wala sila makadawat og taho nga adunay nadawat nga hulga sa kinabuhi ang kanhi mayor o pamilya niini.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph