NAPAKYAS na usab si Aston Palicte sa iyang pagsuway og langkat sa World Boxing Organization (WBO) world superflyweight title.
Kini human nga ang 28-anyos ug lumad nga taga Bago City nasugamak og 10th round technical knockout (TKO) nga kapildihan batok sa haponanon nga si Kazuto Ioka niadtong Miyerkules sa gabii didto sa Chiba City, Japan.
Kadto maoy ikaduhang away ni Palicte alang sa maong kampiyonato diin sa unang higayon iyang gikasangka si four-division champion Donnie “Ahas” Nietes sa niaging tuig nga miresulta sa kontrobersiyal nga panagtabla.
Sa kadaugan, si Ioka maoy unang haponanon nga nakaangkon og world title sa upat ka division. Ang 30 anyos nga Ioka nakampiyon usab sa minimumweight, light-flyweight ug flyweight division.
Maayo untang nakasugod si Palicte sa unang pito ka mga round ginamit ang iang mga jab-straight nga kombinasyon hangtod sa ikapito nga round diin iyang napasakitan si Ioka sa ikyang sunodsunod nga uppercuts.
Apan daw og sa nahutdan sa hangin si Palicte sa ikawalo nga round ug ning higayona daw og sa hinayhinay nang mibali ang momentum sa away samtang si Ioka mipauwan na sa iyang mga kumo ngadto sa lawas ug ulo ni Palicte.
Sa ikasiyam nga hugna milutaw na ang eksperiyensiya ni Ioka kinsa 17 na ka higayon nga nakaaway og world title. Way puas kini nga mirumbo og maayo ni ni Palicte.
Ug sa ikanapulo ka round, usa ka overhand right nga miigo sa nawong ni Palicte maoy nakapabangog sa nauwahi ug ning higayona wa usab dayon palabya sa Japanese fighter ang oportunidad.
Ang nag-aso-aso nga mga kinumo ni Ioka maoy nakapaaghat ni referee Kenny Chevalier sa pag-undang sa away sa 1:15 sa maong round.
Ang 30-anyos nga Ioka mipasaka sa iyang record ngadto sa 24-2, 14 KOs samtang si Palicte nahagsa sa 25-3-1, 21 KOs.
Usa sa duha ka pildi ni Ioka gikan sa mga kamot ni Nietes niadtong Enero 1 ning tuiga pinaagi sa majority decision sa ilang away alang sa mao gihapong titulo. Hinuon, ang maong titulo gibuhian ni Nietes aron malikayan ang pagpakig-rematch ni Palicte.
Sa niaging buwan, si Nietes mipadayag nang daan nga bisan kinsa ang modaog tali ni Palicte ug Ioka, andam na siyang makig-rematch niini aron malabni pagbalik ang kampiyonato. (JBM)