SECTIONS
Monday, September 16, 2019
SUPERBALITA CEBU

Migallen: POC gubot pa sa lukot

Taym pa

DAGHAN nahikurat niining kalit nga pagluwat ni Ricky Vargas sa pagka presidente sa Philippine Olympic Committee (POC) niadtong Hunyo 18, adlawng Martes.

Kini iyang gihimo pinaagi sa pagsumiter og irrevocable resignation letter ngadto sa executive board atol sa executive session sa POC.

“This is to inform the Executive Board of the Philippine Olympic Committee that I am tendering my irrevocable resignation from the post of President of the organization, effective immediately,” nagkanayon si Vargas sa iyang suwat.

Di nato malalis nga gikan pa lang niadtong paglingkod niya sa puwesto, mga 16 ka buwan ang nakalabay human niya mapildi si Peping Cojuangco sa piniliay, gihamok og sunodsunod nga kasamok ang maong ahensiya.

Usa niini mao ang pagpahigayon og meeting sa executive board nga dili siya mismo pahibaw-on. Mora og gikodeta siya sa mga kaabin ni Cojuangco kinsa 13 ka tuig nga midominar sa POC.

Bisan tuod og napildi sa ilang piniliay, aduna gihapoy papel sa POC kay gitudlo man gihapon siya ni Vargas nga chairman sa POC Constitutional Revisions and Ammendments committee.

Apan niadtong Mayo gitaktak ni Vargas si Cojuangco ug ang pipila ka mga officials sa POC nga gidudahang nagkunsabo aron siya mapalagpot.

Wa siguro kaagwanta si Vargas sa pressure napugos kini sa pag-resign nga wa gani abiso bisan sa iyang mga kauban.

Atong girespetohan ang desisyon ni Vargas, pero ambot ug nganong nagdali-dali siya sa iyang hukom.

Wa pa siya makapakita og agi sa iyang pagka POC president, aduna pay daghan problema nga angay hatagan og solusyon ug labaw sa tanan, anaa pa sa makuting preparasyon alang sa pag-host sa nasod sa Southeast Asian Games.

Kini maoy dakong hagit ug pagsuway sa iyang liderato.

Gikonsiderar usab unta niya ang kataas sa panahon nga gikombati sa mga atleta ug mga sports leaders ang pagputol sa dominasyon ni Cojuangco sulod sa 13 ka tuig.

Apan subo palandungon nga sulod ra diay sa 16 ka buwan ang iyang paglingkod.

Si Joey Romasanta, ang kaabin ni Cojuangco, mao karon ang molingkod isip POC President sanglit siya man ang first vice-president.

Pero ang chairman sa POC nga si Abraham “Bambol” Tolentino, maoy kaalyado ni Vargs, miingon nga mopatawag siya og general assembly ug special election sulod sa 30 ka adlaw kay ubos sa ilang gitamod nga bylaws dili man makasumir ang vice president kon kini dili kini qualipikado.

Si Romasanta gitumbok nga dili kwalipikado kay dili man siya presidente og National Sports Association (NSA). Apan hugot kining miinsister nga iyang tiwason ang termino ni Vargas kay siya man ang next in rank.

Tungod niining managlahing bersiyon, hayag pa sa takdol nga buwan nga mahitabo na usab ang laing kaguliyang sa POC.

Dili kaha mao na unya kini hinungdan nga isuspenso sa International Olympic Committee (IOC) ang POC ug mao na usab kini rason nga posibling dili na unya kita makaapil sa 2020 Olympic sa Japan?

Hinaot nga dili ni maoy kapadulngan, pero og dili gani ni mahatagan og solusyon, aw asa pa man paingon. (jun.migallen22@gmail.com)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph