Super Suroy: Trondheim, Norway hiyas sa scenic spots, history

ILA CHURCH: Natukod niadtong 1889 nga usa sa labing karaan simbahan kansang ang luyo ang bahin niini nahimutang sab ang karaang sementeryo. (Hulagway kuha ni Flornisa Marie Gitgano)
ILA CHURCH: Natukod niadtong 1889 nga usa sa labing karaan simbahan kansang ang luyo ang bahin niini nahimutang sab ang karaang sementeryo. (Hulagway kuha ni Flornisa Marie Gitgano)

DAGHANG Pinoy ang nangandoy nga makabakasyon sa Europe ilabi na sa nasud sa France, Spain, Italy ug United Kingdom gumikan sa mga nabantog na nga tourist spot sa maong dapit.

Apan, adunay lugar sa Uropa nga di lang ang kanindot sa talan-awon ang mahatag nga maghatag og kalinaw sa panghunahuna ug labaw sa tanan safe ang imong pagsuroy-suroy. Mao kana ang Norway.

Base sa ranking nga gibuhat sa Global Finance sa tuig 2019 (www.gfmag.com), ikaunom ang Norway sa World’s Safest Countries sa maong website, ikapito ang Norway sa Richest Countries in the World 2019.

Ang Superbalita Cebu nisuroy sa Trondheim, ikatulo nga dakong siyudad sa Norway.

Makasaysayanong dapit

Numero unong angayang anaa ilista sa inyong bucketlist kon mobisita sa Trondheim mao ang Nidaros Cathedral, ang pangalang Nidaros mao ang medieval nga ngalan sa Trondheim.

Sigun sa kasaysayan ang Nidaros Cathedral mao ang naila nga “World’s Northernmost Gothic Cathedral.”

Gisugdan kini pagtukod niadtong tuig 1070 sa lugar kung diin gilubong si St.Olav, usa ka Viking king nga maoy nagdala sa Kristyanismo sa Norway ug maoy founder sa syudad sa Trondheim.

Natapos ang katukoran sa cathedral niadtong tuig 1300.

Mahingangha ka sa kadako sa karaang cathedral ug sa sopistikado nga desinyo niini hinungdan nga dagsaan sa mga turista.

Pipila lang ka metros gikan sa cathedral makita ang Torvet o ang city market square diin anaa ang monumento ni St. Olav.

Mamahimo usab makarelax ug matilawan ang mga local ug international nga restaurants, fastfood chains ug coffee shops dinhing dapita.

Ang nakanindot sa Trondheim anaa kasagaran ang mga nabantog nga tourist spots sa sentro ug walking distance ra.

Bryggene o ang The Warehouses

Sa likod nga bahin sa Nidaros Cathedral, anaa mahimutang ang Bryggene o The Warehouses ug Old Town Bridge.

Ang mga warehouse anaa mahimutang kilid sa usa ka sapa nga gitawag og River Nidelva ang maong lugar sa mga warehouse mao ang pinakakaraan nga wharves.

Ang sapa dako kaayog papel sukad nahimong syudad ang Trondheim diin sa maong dapit nagsugod ang trading sa lugar niadtong 1600’s.

Ang mga trading ships anha magdiskarga sa mga baligyaon ug direkta na ngadto sa mga warehouse ug ibaligya.

Nabantog kini nga attraction tungod sa kasaysayan niini ug nindot tan-awon tungod sa nagkadaiyang kolor sa buildings niini.

Mamahimo kang magpaduol sa mga warehouse tungod anaa kini mga bangko sa kilid sa sapa aron maka-relax ug maka-selfie o groufie.

Ang Bryggene nalakip usab sa listahan sa UNESCO sa World Cultural Heritage sites sukad niadtong 1979.

Ang Old Town Bridge ma-agian ra usab diha duol sa mga warehouse nga natukod niadtong 1681.

Nailhan usab ang bridge sa pangalan nga “Lykkens Portal” o “Portal of Happiness.”

Puno sa kasaysayan ang Trondheim ug daghan kini nga mga karaan nga nga simbahan sama nalang niining Ila or Ilen Church nga ana mahimutang sa Ila, ang west nga bahin sa Trondheim.

Gidesinyo kining maong simbahan ni Architect Eugene Sissenére pinaagi sa Gothic Revival style.

Gitukod kini pinaagi sa mga dagkong bato ug aduna kini atop nga ginama sa kahoy ug nahimong balaang simbahan niadtong Hunyo 7, 1889.

Ang organ instrument niini gimugna dungan sa katukoran sa simbahan.

Nailhan ang Ila Church tungod mao lang kini ang simbahan nga adunay karaang sementeryo (nahimutang unahan nga bahin sa simbahan) nga gigamit pagbalik sa kasaysayan sa Trondheim.

Munkholmen Island

Kon anaa usab ka sa Ila, makita usab gikan sa mainland ang Munkholmen Island, ang isla nga anaa sa Trondheim Harbour area.

Ang Munkholmen, nga adunay original name nga Nidarholm, adunay gilay-on nga duha ka kilometro gikan lsa centro sa syudad.

Kaniadtong Viking Age, ang isla maoy lugar diin ipahigayon ang public execution.

Sa maong lugar diha gibutang ni Olav ang ulo sa iyang mga kaaway nga gisab-it sa mga tukon human nida-og siya sa pagkuha sa gingharian ug pagpakatap sa Kristyanismo sa Trondheim niadtong tuig 995.

Karon usa na kini sa mga tourist attraction sa Norway nga pwede mabisita sa mga turista pinaagi sa pagsakay sa motor banca.

Kaning tanang nahisgutan pipila lang sa mga tourist spot sa Norway, labi na sa Trondheim.

Apan bisan asa ka man dapita magsuroy-suroy sa Trondheim, mahimuot ka gayud sa mga building ug panimalay tungod kay nagkalainlain ang kolor niini nga naglinya sa dalan.

Ang kinaiyahan, labi na ang mga buwak sa summer, perfect alang sa pictorial.

Kasagaran nga dagsaon ang Trondheim panahon sa summer.

Apan angay nga timan-an nga bisag summer tugnaw gihapon ang maong lugar ug kinahanglan gayud mag-jacket.

Mokalit usab pag-uwan sa nahisgutang syudad bisag summer so mas maayo nga magdala og payong labi na kung adunay daily itinerary.

Ang katahom sa kinaiyahan, maanindot nga talan-awon ug puno sa kasaysayan ang masaksihan sa Trondheim, Norway. /

(Ang detalye kabahin sa history sa Trondheim gikan sa www.trondheim.com; pilegrimsleden.no ug www.visittrondheim.no)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph