NAMAHAYAG si Bise Mayor Edgardo Labella nga inig lingkod niya isip mayor sa syudad sa Sugbo sa udtong tutok karong Hunyo 30, moluwat siyag og usa ka executive order aron pabuhian kadtong mga motorsiklo nga na-impound tungod kay nasakpan nga nag-counterflow.
Ingon sa naunhan ang umaabot nga bag-ong mayor sa Cebu City Transportation Office (CCTO). Kay matod pa ni CCTO Chief Francisco Ouano niadtong Martes, Hunyo 18, ang tanang motorsiklo nga na-impound giclaim ug gi-release na ngadto sa ilang mga tag-iya.
Wa nay bisan usa ka motorsiklo nga na-impound tungod sa pag-counterflow ang nahibilin, matod pa ni Ouano. Di na kinahanglan nga moluwat og executive order si Labella bahin niini.
•••
Matod pa ni Ouano, sa dihang naghinandas ang ilang pagpatuman sa Executive Order No. 34 nga giluwatan ni outgoing Mayor Tomas Osmena niadtong Pebrero 2, 2018, mokabat sa 8,000 ka mga sakyanan, kadaghanan niini mga motorsiklo, ang ilang na-impound tungod sa pag-counterflow.
Ang mga motorsiklo ma-claim sa tag-iya human sa 30 ka adlaw ug kon makabayad sa multa nga P1,000. Apan si Ouano niingon nga nihunong na sila sa pagpatuman sa maong executive order kay dyutay na man lang ang nag-counterflow.
Duna pay mga sakyanan, lakip sa mga motorsiklo, nga na-impound, pero ang kalapasan niini way kalambigitan bahin sa counterflow, matod pa ni Ouano.
•••
Atol sa kampanya, si Labella nisaad nga buhian niya ang mga motorsiklo nga na-impound kay ang executive order ni Osmena bahin sa counterflow nagdaug-daog sa mga pobre kay kadaghanan sa mga motorsiklo gigamit nga panginabuhi pinaagi sa paghimo ninii nga habal-habal.
Apan si Osmena nisakay sa isyu sa mga habal-habal ug sa Angkas ug gihatagan pag tagsa ka sakong bugas ang mokabat sa 6,000 ka mga Angkas ug habal-habal drivers sa syudad sa Sugbo.
Ang paghatag og bugas giaprobahan sa konseho sa syudad apil na ang mga sakop sa oposisyon. Ambot lang kon nabayran na ba sa gobyerno sa syudad ang supplier sa bugas nga gihatag sa mga habal-habal ug Angkas drivers.