SUMPAY kini sa atong lindog kagahapon kabahin sa brutal nga pagpatay kang kanhi Medellin Mayor Ricardo Ramirez sulod sa Bogo-Medellin Medical Center niadtong miaging tungang gabii sa barangay Luy-a, Medellin. Sa atong lindog kagahapon, atong gipalutaw nga posibleng biktima si Ramirez sa extra-judicial killing (EJK). Kay ngano man? Dako ang akong pagtuo nga ang operasyon usa ka government sponsored. Buot nakong ipasabot nga binuhatan kadto sa mga ahente sa gobiyerno ug adunay gamhanan nga opisyal ang nagmando.
Ang nahitabo kang Ramirez dili layo sa nahitabo nila ni Mayor Rolando Espinosa Sr., sa Albuera, Leyte ug amahan sa druglord nga si Kerwin Espinosa, ug ni Mayor Nonie Blanco sa Ronda. Si Espinosa gilusob sa mga elemento sa CIDG 8 ug gipatay sulod sa bilangguan. Samtang si Blanco gisulod sa iyang buhatan sa municipal hall diin siya magpuyo ug didto gipatay. Daghan pang mga pulitiko nga nahilambigit sa illegal nga drugas ang gipamatay. Kasagaran sa ilang mga kaso, wa mahatagi og kasulbaran.
Ang common aning tulo ka mga biktima kay pulos sila gikatahong nahilambigit sa illegal nga drugas. Gi-ila sila nga mga “narco-politicians.” Sakit man tuod kining dawaton sa mga kabanay ni Ramirez apan nabaniog na nga siya drug user. Gani ang kapulisan mao ang nagbutyag niini. Si Lt. Col. Eloveo Marquez, hepe sa provincial investigation and detection management unit mao ang mibutyag sa interview sa GMA 7 Balitang Bisdak, kabahin sa kalambigitan sa kanhi mayor sa illegal nga drugas. Posible usab nga drug protector si Ramirez sa drug dealers sa iyang lungsod.
Ngilngig ang operasyon. Tiaw ba nimo kanang 15 ka tawo nga armado og high powered firearms ang milikidar. Kursunado sila gumikan kay wa magpanagana sa pagtipi sa mayor sulod sa hospital. Matod sa mga saksi, duha ngadto sa tulo ra ka minutos humana ang operasyon.
Maayo ang nahitabo kang Espinosa kay na-ilhan nga mga pulis ang nagbira kaniya. Sa kang Blanco wa pa. Blangko pa gihapon ang mga awtoridad. Gi-imbestigahan gyud kaha ang kaso ni Blanco? Posible mao usab kini ang mahitabo aning kang Ramirez. Mahulog sa bung-aw dayon katunaw.(bobbygnalzaro@gmail.com)