MIINIT og maayo ang isyu sa West Philippine Sea human sa bangga sa duha ka mga sakyanan sa kadagatan. Ang nibangga mao ang barko sa China ngadto sa bangkang panagatan nga iya sa mga Pinoy nga mananagat.
Ang bangga nahitabo sa Reed Bank nga naa sulod sa exclusive economic zone (EEZ) sa Pilipinas.
Lahi sa isyu sa basura sa Canada, si Presidente Rodrigo Duterte nagpakaamang pipila ka mga adlaw human sa insidente.
Dihang nitingog na, daghan ang nahimangod kang Duterte kay ingon sa gipakagamay lang niya ang hitabo.
Ang Department of Agriculture ubos kang Secretary Manny Piñol nakigtagbo gilayon sa 22 ka mga mananagat aron pakigsultihan ug hatagan og mga hinabang, sama sa pumpboats, diin nagtagsa na sila.
Samtang ang China, gaan ra og pamahayag. Nikompirmar man tuod sila nga ilang barko ang nakabangga, apan igo ra silang nagpahasubo ngadto sa mga mananagat.
Nisuway pa sila sa pagtabon sa ilang kaakuhan pinaagi sa pag-ingon nga gidumog sa laing mga panagatang Pinoy ang ilang barko, apan ila na hinuong gibakwi kay lisod ipanghimakak.
Duha ka butang ang naklaro karon: iya sa China ang barko ug wa nila luwasa ang mga mananagat. Gihulagway gani kini ni Foreign Affairs Secretary Teodoro Locsin nga krimen sa iyang pagpamulong sa usa ka tigom sa United Nations (UN).
Mabugnaw lang tingali ang kasuko sa publiko kon ang China mangayo og pasaylo sa hitabo. Bisan tuod makapanghimakak sila nga gituyo ang bangga, di nila ikapanghimakak nga ilang gibiyaan ang mga mananagat human sa bangga. Hayan kon wa pa maluwas sa barkong panagatan sa Vietnam ang mga mananagat, posibleng dunay dautang mahitabo.
Gawas sa pagpangayog pasaylo, kinahanglang ilang silutan ang ilang mga tawo nga nalambigit aron di kadudahan nga ang ilang kagamhanan mismo ang nagpaluyo. Dinhi na maila kon ang China tinuod ba nga higala sa Pilipinas.