UNOM ka mga gradwado sa senior high school lakip sa na hired-on-the-spot sa labing uwahi nga gipahigayon nga Kalayaan Jobs Fair sa Department of Labor and Employment (DOLE) 7 niadtong Independence Day.
Samtang niabot og 124 ang na-HOTS atol sa jobs fair sa dakbayan sa Lapu-Lapu, mga lalawigan sa Bohol ug Negros niadtong Hunyo 12.
Lakip sa trabaho nga nakuha sa senior high school graduates mao ang marshals, electricians, production workers, ug production operators.
Usa sa na-HOTS ang 18-anyos nga si Kristine Vil Bendoy atol sa jobs fair sa Lapu-Lapu.
Makatrabaho si Bendoy isip production operator sa industrial production company sa Lapu-Lapu City.
“I really wanted to work right after graduating from senior high school to help support and provide the daily needs of my family. I have five siblings and we are being raised alone by my father who is a tricycle driver,” si Bendoy kinsa bag-o lang nakatapos sa K-12 niadtong Abril sa Babag National High School sa Accountancy, Business, and Management K-12 strand.
Si Dole 7 Regional Director Salome Siaton nagkanayon nga nagpamatuod lang kini nga andam na ang senior high graduates nga makatrabaho.
Dugang niini nga posible pa madungangan ang HOTs pinaagi sa 446 ka mga aplikante nga nearly-hired, diin 297 niini local employment ug 149 sa overseas employment.
Malaumon usab ang direktor nga mosaka pa ang employment rate sa rehiyon diin anaa na kini sa 94.8% niadtong Enero karong tuiga. (HBL)