NIDEKLARAR na ang Philippine Atmospheric, Geophysical and Astronomical Services Administration (Pagasa) sa miafing semana sa 'panahon sa ting-wan' apan, naoberbahan sa samang ahensiya nga minos gihapon ang uwan base sa iyang normal nga sukod sa buhos kon panahon sa ting-wan.
Hinuon, ang naasoy nga taho sa nasudnong buhatan sa Pagasa nagkanayon nga pipila ka bahin sa nasod nga nagpabilin ang epekto sa weak El Niño phenomenon labi na sa kasadpan nga bahin.
Sa probinsiya sa Sugbo, nasati nga 61% sa naandan nga gidaghanon unta sa tubig-ulan ang nawala sa milabay nga tulo ka buwan hinungdan nga gideklarar sa Pagasa Visayas nga dunay drought o abnormal low rainfall condition sa Sugbo.
Si Engr. Al Quiblat, office-in-charge (OIC) sa Pagasa Visayas, nitaho sa Provincial Disaster Risk Reduction Management Council (PDRRMC) nga gani ning buwan lang sa Hunyo, 89% ang nawagtang nga ulan ug nagpasulabi ang kainit.
Tungod sa pagsiaw sa El Niño, gitumbok sa Pagasa nasinati sa Sugbo ang drought niadtong Mayo 31, 2019.
Ang drought o huwaw usa ka specific period diin dunay abnormal low rainfall sa usa ka dapit nga moresulta sa pagnihit sa tubig.
Matod niya, way below normal ang tubig ulan nga ilang nakolekta sulod niining maong panahon.
“Meaning, Cebu experienced above or more than 61% reduction of rain nga dapat maadawat nato,” pasabot ni Quiblat.
Karong buwana, Hunyo, gitumbok hinuon ni Quiblat nga posibleng mabalik na sa normal ang ulan dinhi sa Sugbo.
Apan sa data nga nahipos sa Pagasa gikan Hunyo 1 hangtud Hunyo 20, niabot lang og 10.8% sa normal nga pag-uwan.
Matod ni Quiblat, ang nawagtang nga tubig-ulan moabot sa 190,400 cubic meters o 850, 000 drums sa tubig matag usa ka square kilometer area.
“Today, the rainfall accumulated reported by PAGASA Mactan is only 10.8% of the normal. Meaning nawagtang ang 89 o almost 89% (of rainwater). That is equivalent to 190.4 mm of rainfall per square kilometre area,” gitug-an ni Quiblat.
Sa climate outlook nga gitaho ni Quiblat, nasuta nga near normal na ang masinati nga ulan sa buwan sa Hulyo ug above normal usab sa buwan sa Agusto.
Sa nahibiling mga buwan sa tuig 2019, gipahibalo niya nga may 10 ngadto sa 13 pa ka mga bagyo ang posibleng mosulod sa Philippine Area of Responsibility (PAR).
Karong Dominggo, dunay gilantawan nga low pressure area nga mosulod PAR. Hinuon, ubos ang kahigayunan nga mahimo kini bagyo o mo-landfall sa bisan asang bahin sa nasud.
Pagka-karon, anaa pa kini sa kapin 1,000 km east southeast sa Mindanao ug hinay ang pag-irog niini.
“The distance from east southeast of Mindanao is mga 1,300 km. However it is moving very slow and for now the chance to become a bagyo is low but there’s a high chance to enter the Phil. Area of Responsibility,” sigun ni Quiblat. (AZLG)