NAUGDAW ang 80 ka mga balay sa Sitio Ibabao, Brgy. Pusok, Dakbayan sa Lapu-Lapu sa sunog pasado alas 5 sa Miyerkules sa buntag, Hunyo 20.
Nadawat ang alarma sa kabomberohan alas 5:41 sa kadlawon nga dali usab nga girespondehan sa mga sakop sa Lapu-Lapu City Fire District.
Matod ni Fire. Supt Crispulo Eusebio Jr., fire marshall sa Dakbayan sa Lapu-Lapu, nagsugod ang kayo sa balay sa usa ka Gina Rosales, nga giingong way tawo niadtong tungora.
Kasagaran sa mga balay ginama sa light materials, paspas nga nakakatap ang kayo sa kasikibit nga mga balay hinungdan nga dugay usab nakontrolar sa kabomberohan.
Nakatampo usab ang kahagip-ot sa dan sa dapit nga nasunogan, diin wa makasulod ang mga fire truck.
Tungod sa kakuwang og access road, kinahanglan pang isumpay-sumpay ang mga fire hose aron makapasirit ang mga bombero. Alas 6:10 sa kabuntagon, giisa gilayon sa 3rd alarm ang alarma ug alas 6:26 sa buntag na kini nakontrolar sa kabomberohan.
Wa hinuoy natala nga naangol o nakalas atol sa sunog.
“The most important thing is we give most important to the people, inano muna namin yung tao, ini-evacuate. So, yun ang aming una talagang inuna,” matod ni Eusebio Jr.
Sa pakisusi sa Lapu-Lapu City Fire District, posibleng nabiyaan nga appliance o nalimtan nga gi-plug nga wire ang hinungdan sa sunog.
Wa usab nila gisalikway ang pangangkon sa pipila ka mga lumolupyo sa lugar ug ni Rosales nga posibleng grounded ang atop sa iyang panimay.
Ilang gisusi ang taho nga adunay misiga o spark sa balay ni Rosales dihang miulbo ang sunog.
Si Rosales nagkanayon nga sa pagkakita niyang nagsiga na ang ilang atop, dali niyang gisabwagan og tubig apan nidako ug nikatap na hinuon ang kayo ug ni spark ang wire sa kurente. Nagbilin kini og P450,000 nga danyos.
Kasamtangan gipahimutang sa Mini Hoops Dome sa Brgy. Pusok ang mga nasunogan.
Apan pipila kanila mas gipili nga magpaduol lang una sa ilang nasunog nga mga balay.
Sumala ni Jesus Marcus Antonius, social welfare administrative II, nga dul an sa 200 ka mga residente ang gipang apud apuran og mga hinabang nga bugas, cup noodles, sardinas ug uban pa nga gikan sa Local Government Unit (LGU). (GCM & Meira Claire Jamisola, CNU Comm Intern)