SECTIONS
Thursday, July 18, 2019
SUPERBALITA CEBU

Police official sa Cordova gipusil patay

GIPATAY: Si Police Chief Master Sergeant Deogenes Carrillo namatay human pusila sa duha ka mga tawo nga nag-angkasay sa motorsiklo. (Tampo)

NAMATAY diha-diha ang deputy chief sa Cordova Police Station human pusila sa duha ka mga lalakeng luwan sa motorsiklo sa Brgy Poblacion, Cordova pasado alas 10 sa Huwebes sa buntag, Hunyo 20.

Pagpautang ug drugas ang duha ka mga nag-unang motibo ang sundon sa kapulisan sa ilang imbestigasyon.

Ang biktima giilang si Police Chief Master Sergeant Deogenes Carrillo, taga Brgy. Punta Engaño, Dakbayan sa Lapu-Lapu.

Si Carrillo nakaangkon og samad pinusilan sa nagkadaiyang bahin sa lawas.

Matod sa mga saksi sa hitabo kalit kaayo ang pagpamusil.

Buto-buto sa armas de fuego ang ilang nadungog.

Sunod na lang nilang nakita naghunong na sa tunga sa karsada ang puting Toyota Hi-Lux (YJZ 820) nga gimaneho ni Carillo.

Natusak-tusak na usab sa bala ang driver’s seat sa sakyanan ni Carrillo.

Nagpasad ang siyam ka mga kabhang ug usa ka fragment sa wa pa matinong kalibre sa armas de fuego.

Nakit-an nga nipasirit padagan ang motorsiklong giluwanan sa mga gunman paingon sa Dakbayan sa Lapu-Lapu.

Giingong naka helmet ug bonnet ang duha ka mga gunman.

“Wa gyud mi kabantay bisag sa plate number kay kalit ra lagi kaayo paspas ra kaayo ang hitabo,” matod sa usa ka saksi nga wa nagpahingan.

Way hulga?

Matod ni Police Captain Efren Diaz Jr., hepe sa Cordova Police Station, nga base sa ilang inisyal nga pakisusi, gikan sa duty si Carrillo ug padung na mopauli sa ilaha sa Brgy. Punta Engaño, Dakbayan sa Lapu-Lapu.

Posible kini nga gisundan o gisabayan sa mga gunman, matod pa ni Diaz base usab sa saysay sa mga saksi.

Gibutyag ni Diaz nga duha ka buwan pa lang nga nahimo niyang deputy chief si Carillo.

Wa kini makahisgot kaniya kalabot sa hulga sa kinabuhi.

Giangkon hinuon ni Diaz nga kanhi sakop sa anti-drug unit si Carillo sa iyang nangaging mga assignment sa Cebu Provincial Police Office (CPPO) ug City of Naga Police Station sa wa pa madestino sa Cordova Police Station.

Laing gitan-aw sa kapulisan sa ilang imbestigasyon kon wa bay nakaaway si Carrillo sa iyang negosyong pautang o patanto nga 5/6 sa lungsod.

Gikan usab naningil si Carrillo sa mga utangan kaniya sa wa pa molahos og pauli.

Susihon sa kapulisan ang closed circuit television (CCTV) footage sa dapit nahitaboan.

Dali untang nipahigayon og checkpoint ang kapulisan sa utlanan sa dakbayan sa Lapu-Lapu ug Cordova alang sa posibleng pagkasikop sa mga gunman.

Nagdumili lang una paghatag og pamahayag ang pamilya ni Carrillo nga daling miadto sa dapit nahitaboan.

Nakapangutana ang pamilya kon nganong wa dayon gitabang ug gida sa tambalanan.

Apan pagpasabot ni Diaz gihiling na si Carrillo gumikan kay human sa pagpamusil, adunay doktor nga nihiling niini.

Nikompirmar nga patay na si Carrillo hinungdan nga gihuwat na lang nila ang mga sakop sa Scene of the Crime Operation (SOCO).

“Nung pumunta kami dito sumunod yung Cordova doctor natin na siyang nag declared na wala nang buhay si Police chief Master Sergeant Carillo,” pagpasabot ni Diaz.

Drugas?

Personal nga atraso ug may kalabutan sa illegal nga drugas ang gitan-aw nga motibo.

Matod ni Police Lieutenant Colonel Eloveo Marquez, hepe sa Investigation and Detective Management Branch ug information officer sa Cebu Provincial Police Office, ilang subayon nganong didto miagi si Carillo sa dapit nga unta padung na kini mopauli.

Matod niya duha ka mga anggulo ang angay tan-awon sa kapulisan.

Kini may kalabutan sa personal nga kinabuhi human masayran nga nagnegosyo kinig pautang sa kwarta sa lungsod sa Cordova.

“Usa sa ma consider nato nga hinungdan naa daw ni siyay pautang didto sa Cordova. So, mag round man daw ni siya murag 5/6 siguro ang style ba. So, usa na sa atong tan-awon,” matod ni Marquez.

Lakip sa ilang tan-awon ang giingong kalambigitan sa illegal nga drugas.

Matod niya nga nalakip ang pangalan ni Carrillo sa mga narco cop sa dihang nadestino pa sa Drug Enforcement Unit sa siyudad sa Naga.

Siya niingon nga wa ma promote si Carillo tungod sa impormasyon nga naa kini sa illegal nga drugas.

“Involved daw ni sa drugs,” dugang ni Marquez.

Sa wa pa nadestino sa Cordova, si Carrillo sakop sa Regional Intelligence Division 7, Provincial Intelligence Branch ug kapulisan sa siyudad sa Naga.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph