ALANG sa mas ispesyal nga pagsaulog sa ilang ika-60 nga anibersaryo, ang Canadian Manufacturing nga inila sa ilang de-kalidad nga mga bed linens, towels ug uban pang produkto milusad sa usa ka produktong tumong nga mas maprotektahan ang kinaiyahan.
Sa nakalabay nga Hunyo 18, gipaila-ila sa kompanya ngadto sa mga Dabawenyos ang ilang produktong bed linens, towels, lakip na punda nga ginama sa Bamboo o ang ilang “Bamboo Cotton Collection.”
Ang Canadian Bamboo Cotton Collection ginama sa 100 percent bamboo o kawayan ug naggamit sa gamay’ng kemikal atol sa produksiyon.
Perfect sab ang tela niini sa weather sa Pilipinas ug alang ngadto sa may sensitibong panit.
Ka-partner nila dinhi ang Haribon Foundation, diin sa matag palit nimo sa ilang produkto, parte sa kitaon niini ihatag sa foundation alang sa ilang Adopt-a-Seedling program.
Ang programa nagtutok sa reforestation tungod sa nagka-upaw nga kalasangan sa nasud.
Ang bag-ong koleksisyon sa Canadian, giingong eco-friendly, diin wa na sab sila migamit sa plastik isip pambalot sa ilang produkto.
Gibitbit nila atol sa launching sa Activity Center sa SM Lanang Premier ang aktor nga si James Blanco ug influencer nga si Joan Mae Soco.
Suma sa duha nga bisan sa ilang panimalay, luyo sa paggamit ug paghimo sa mga eco-friendly nga butang, ginatudluan sab nila ang ilang mga anak nga maghatag sab og pagpangga sa kinaiyahan.
Ang Canadian Bamboo Cotton Collection nakadispli sa activity center sa SM Lanang Premier hangtud Hunyo 23.