Pagpanibat sa mga investors gikalisang sa naka-‘pay in’

DAVAO DEL SUR -- Giangkon sa mga mibubo og kapital sa probinsiya ngadto sa mga investment company sa Tagum City nga naalarma na sila sa pagsibat sa ubang operators niini.

Usa si Marcela, 54, (apilyedo gipugngan), taga Digos City, nga miapil sab siya sa Titan 29 Marketing diin anaa sa P30,000 ang gibutang niini.

Human masayod sa balita nga wa na igkita si Ryan Maunes nga mao ang operation manager sa kompaniya, naguol na ang ginang.

Sama kaniya, naguol sab si Rebecca, 48, sa Bansalan kay wa nay klaro kon mahibalik pa kanila ang iyang P50-mil nga gibutang sa Kapa (Kabus Padatoon) Community Ministry International Inc., kon diin ang founder si pastor Joel Apolinario.

Usa ka Facebook post sa Kapa Global page sa Facebook, nakita nga naghapin og karton si Apolinario samtang natulog sa yuta.

Niadtong Miyerkules, Hunyo 19, laing operator sa Enterprise Company (Enco) ang di na makontak sa ilang mga kliyente didto sa Tagum City human misibat ang operations manager nga si Miss Berneche Azucena, residente sa Barangay Magsaysay, Carmen, Davao del Norte.

Si Police Colonel Ferlu Silvio, police provincial director nga gihinabi sa SunStar Superbalita Huwebes sa buntag, nagbutyag nga mobalor sa P80-milyones ang nahanaw gikan sa mga investors.

Kini sab ang ikatulong kompaniya investment sa Tagum nga nahanaw human unang misibat ang chief executive officer (CEO) Kennerth Paz Nagas sa QuestLink Digital Marketing Services, dala ang salaping mobalor sa P200-milyones.

Ang Questlink misaad sa mga investors nga adunay tubo nga 500 porsiyento ang ilang kapital sud lang sa 15-adlaw apan karon nawagtang na ang tubo apil ang puhonan sa mga biktima.

Niadtong Miyerkules, Hunyo 18, ang CEO ug proprietor sa P7 Beauty and Health Products Marketing, mihimo og “affidavit of undertakings” sa korte nga di na nila masustento ang gisaad nga 600-porsiyentong tubo sa puhonan mao nga iuli nila ang kapital ug anaa na lang sa 300-porsiyento ang makuha sa matag investor.

Si Angelo Goc-ong sa iyang affidavit nagbutyag nga nakasinati og suliran ang ilang kompaniya mao nga nahitabo kini.

Daan nang nagpasidaan ang Securities and Exchange Commission (SEC) ngadto sa publiko nga di moapil sa mga investment schemes sanglit mameligro ang ilang kuwarta apan nagmagahi ang katawhan tungod kay nahaylo sa gitanyag nga dakong tubo sa ilang kapital.

Sama sa ubang biktima sa investment schemes, kasubo ang gibati sa mga sakop sa Kapa human nga apil nahanaw ang ilang gipatulog nga kuwarta nga karon daw mahitabo na nga mora og “giurom” na kini human gipadayag ni Apolinario nga naglisod na silang maka-suweldo sa ilang mga trabahante sa kompaniya tungod kay adunay “freeze order” ang gobyerno sa mga propedad ug pundo sa organisasyon. (Orlando B. Dinoy)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph