KIDAPAWAN CITY -- Bantayan sa Philippine Health Insurance Corporation (PhilHealth)-Soccsksargen ang 20 ka dialysis centers nga niagi og tinuig nga akreditasyon nga proseso sa rehiyon.
Kini ang gipasabot ni PhilHealth-Soccsksargen Health Care Delivery and Management Services Division chief Dr. Antoniette Ladio.
Matud ni Ladio, ilang susihon ang pagtuman sa mga dialysis centers nga dunay mga kinahanglanon sa akreditasyon.
Nagpasalig sab ang opisyal nga hugtan sa insurance ang pagsusi sa nahisgutang mga center human nga nadiskobre ang giingong “ghost patients” ug mga tambal sa ubang dapit sa nasud.
Gikanayon niya nga ang PhilHealth-Soccsksargen nagpatuman sa mga pagsusi sa pre-medical ug ebalwasiyon sa mga ospital.
Giklaro sa opisyal nga ang PhilHealth-Soccsksargen nagsusi pag-ayo kung ang diagnosis sa pasyente nahiuyon sa adlaw sa pag-admit, gihatag nga mga tambal ug pagtambal sa mga pasyente.
Dugang ni Ladio nga kung dunay pagduda sa ospital, ila dayon kining ipasa sa ngadto sa legal services unit.
Hinuon, sumala sa head of membership sa PhilHealth-Soccsksargen nga si Nevin Hallegado aron masayran ang anomaliya sa mga pasilidad sa panglawas kinahanglan usab nila ang tabang sa publiko. (Edgar E. Fuerzas)