NANAWAGAN ang Regulatory and Complaint Board (RCB) nga hunongon na ang pagsige og download o pagpasa sa sex video sa mga menor de edad nga estudyante sa usa sa dakong tunghaan sa Cagayan de Oro.
Giingong lakip sa porn sites o porn hub makita na ang maong video, hinungdan nga naghangyo ang RCB nga unta hunongon na kini.
Sa pakighinabi sa SunStar Superbalita Cagayan de Oro, miingon si Antonio Resma Jr. nga ila na nga giduso ang impormasiyon ngadto sa tinugyanan sa National Bureau of Investigation (NBI) diin posibleng dako ang matabang ilabi na ang giingong inter-agency against trafficking and prostitution aron sa posibilidad nga mahanaw ang video ilabi na diha sa giingong malaw-ay nga website.
"Gi-forward lang nato sa NBI ang mga information nga nakuha nato ma'am, labaw na kadtong naa na sa porn site na upload ang video," matud ni Resma.
Naghangyo mismo ang RCB ilabi na si Resma nga ihunong na ang pagpakatag sa maong video.
"Manawagan gyud ang RCB ug ako personally nga unta i-hunong na ang pagpasa or download sa mga tao ani na video. Hinaot ang moralidad nato ang mangibabaw ani nga incident," dugang ni Resma.
Nanghinaot usab kini nga unta tabangan ang maong menor de edad nga makalingkawas sa nasinatian niini karong panahona pinaagi sa pag-undang na sa pagpakatag sa maong video.