GIAKUSAHAN og pagpanglugos sa iyang half sister nga 14 anyos ang usa ka lalaki hinungdan sa pagkasikop niini niadtong Hunyo 18 sa gabii diha sa Barangay Gusa, siyudad sa Cagayan de Oro.
Ang suspek naila nga si Charlito (bansagon gitago), 30, taga Jasaan, Misamis Oriental ug usa ka construction worker kinsa kasamtangang nanimuyo sa Villa Ernesto, Gusa, siyudad sa Cagayan de Oro.
Sa inisyal nga imbestigasiyon sa kapulisan sa Police Station 3 (PS3) sa Agora, giingong kanunay na buhaton sa suspek ang pagpanghilabot sa menor de edad hangtod nga gani kini nimabdos.
Giingong gibaligya pa sa suspek ang iyang anak nga duha pa ka bulan.
Samtang sa pakighinabi sa Superbalita kang Charlito, iyang gipanghimakak ang alegasiyon ug gibarugan nga inosente siya ug walay gihimong dautan sa maong babaye.
Matud ni Charlito nga dili niya igsuon ang 14 anyos ug usa ka tuig sila nga nag-ipon niini.
Gibutyag ni Charlito nga nag-ulian pa kaniya ang batan-on, gani plano niya nga kini pa-eskwelahon apan iyang gikakurat nga gikasohan na siya og rape.
“Murag kana iyang uyab-uyab mao nay naghunghong sa iyaha ba, wala man mi ingon nagbulag. Dili nako siya igsoon uy, buhat-buhat ra gyud na nila nga istorya," butyag ni Charlito.
Gipanghimakak usab niini ang alegasiyon nga gibaligya ang ilang anak kun dili iya lang gibilin sa iyang kaila tungod kay magsige og lakaw-lakaw ang 14 anyos.
“Gusto nako ma settle mi duha. Lisod na og makigbalik unya iya gihapon ko ipapreso. Wala nako gibaligya uy, hag-as man siya nag-ingon nga gi-prenda daw namo ang bata, 14 pa daw kuno iyang edad. Grabe gyud siya maghimo og istorya,” matud ni Charlito.
Sa pagsulat niini nga balita, ang maong suspek ang kasamtangang nagtingkagol sa mini cell sa PS3 sa Agora.